سەرچاوەیەک شوێنی جێگرەوەی ئەبوبەکر بەغدادیی خەلیفەی کوژراوی رێکخراوی تیرۆریستی داعش ئاشکرا دەکات.

ماڵپەڕی (RT)ی رووسی لە زاری سەرچاوەیەکی ئەمنیی عێراقی بڵاوی کردووەتەوە، ئەبو ئیبراهیم ئەلقوڕەیشیی خەلیفەی نوێی داعش لە عێراق نییە و لەم ماوەیەدا نەهاتووەتە عێراق.

ئەو سەرچاوەیە هەروەها رایگەیاندووە، زانیارییە هەواڵگرییە عێراقییەکان ئاماژە بەوە دەکەن، کە ئەبو ئیبراهیم ئەلقوڕەیشی ئێستا لەناو خاکی سووریایە.

رۆژی 21-4-2020، میدیا عێراقییەکان بڵاویان کردەوە، کە ئەبو ئیبراهیم ئەلقوڕەیشیی خەلیفەی نوێی داعش لەناو خاکی عێراق دایە و خۆی سەرپەرشتیی کردە تیرۆریستییەکانی چەکدارەکانی دەکات.

دوای کوژرانی ئەبوبەکر بەغدادی، چەکدارانی داعش ئەبو ئیبراهیم ئەلقوڕەیشییان بە خەلیفە هەڵبژارد. ئەلقوڕەیشی، کە هاوکات نازناوی ئەبو ئیبراهیم تورکمانی و ئەبو ئیبراهیم قارداشیشی هەیە، خەڵکی شارۆچکەی تەلەعفەرە لە پارێزگای نەینەوا.

بەرەبەیانی رۆژی یەکشەممە 27-10-2019 لە ئۆپەراسیۆنێکی تایبەتدا، تیمێکی یەکەی سەربازیی تایبەتی ئەمریکی بەناوی (دەلتا فۆرس)، ئەبوبەکر بەغدادی، خەلیفەی داعشی لە شاری ئیدلیب لە باکووری رۆژئاوای سووریا، کوشت.










باسنيوز