سەرۆکی فلیپین فەرمان بە هێزە ئەمنییەکان دەکات تەقە لە هەر کەسێک بکەن، کە پابەندی رێنماییەکان نابێت.

رۆدریگۆ دۆتێرتی، سەرۆکی فلیپین لە لێدوانێکی ڤیدیۆییدا، رایگەیاندووە، پێویستە هەمووان پابەندی رێنماییە پزیشکییەکان بن و لە ماڵەوە دەرنەچن، بۆ ئەوەی پەتای کۆرۆنا لە فلیپین بنبڕ بێت.

رۆدریگۆ دۆتێرتی هەروەها رایگەیاندووە، بارودۆخەکە بەرەو خراپی دەچێ، ”هۆشداریتان پێدەدەم و دەبێ پابەندی رێنماییەکان بن“.

سەرۆکی فلیپین داوای لە هێزە ئەمنییەکان کردووە تەقە لەو کەسانە بکەن، کە پابەندی رێنماییەکان نابن و کێشە دەنێنەوە و و بەو کەسانەی رایگەیاندووە، ”تێگەیشتن؟ دەتانکوژم پێش ئەوەی ببنە هۆکاری دەردەسەری بۆ وڵات“.

تا ئێستا دوو هەزار و 311 کەس لە فلیپین تووشی ڤایرۆسی کۆرۆنا بوون و لەو ژمارەیەشدا، 50 کەس چاک بوونەتەوە و 96 کەسیش گیانیان لەدەست داوە.




باسنیوز