بەپێی زانیاریی میدیاکانی ئێران، چەند چەکدارێکی نەناسراو لە سنووری پارێزگای سیستان و بەلووچستان هێرشیان کردووەتە سەر بنکەیەکی سەربازی و لە ئەنجامدا سێ چەکداری سوپای پاسداران کوژراون.



بەپێی ڕاگەیەندراوێک کە فەیلەقی قودسی سەر بە سوپای پاسداران، شەوی ڕابردوو چەند چەکدارێکی نەناسراو لە سنووری شاری سنووریی "میرجاوە"ی سەر بە پارێزگای سیستان و بەلووچستان، هێرشتان کردووەتە سەر بنکەیەکی سوپای قودس و لە ئەنجامی شەڕ و تێکهەڵچوون سێ چەکداری سوپا کوژراون و چەندین چەکداری دیکەش بریندار بوون.



هەتا ئێستا هیچکام لە پارت و حزبەکانی بەلووچستان بەرپرسیارێتیی ئەو شەڕ و تێکهەڵچوونەیان نەگرتووەتەوە ئەستۆ.



چەند هەفتەی ڕابردووش بەهۆی شەڕ و تێکهەڵچوون لە نێوان هێزە سنوورپارێزەکانی ئێران و هێزێکی چەکدار لە سنووری شاری "زابول" لە پارێزگای سیستان و بەلووچستان، دوو چەکداری هێزە ئەمنییەکانی ئێران کوژران و سێ کەسی دیکەش بریندار بوون.



لە ماوەی زیاتر لە یەک دەیەی ڕابردوودا پرسی میللی و مەزهەبی لە پارێزگای سوننە نشینی سیستان و بەلووچستان لە باشووری ڕۆژهەڵاتی ئێران بە شێوەیەکی بەرچاو گەشەی کردووە و چەند پارت و حزبی میللی و مەزهەبی لەدژی حکوومەتی ئێران دامەزراون و کە هەندێکیان چەکدارن و هەتا ئێستا بە دەیان حاڵەتی شەڕ و تێکەهەڵچوون لە نێوان ئەو لایەنانە و هێزە ئەمنییەکانی ئێران ڕووی داوە و بە سەدان کەس لە هەردوولا کوژراون.





باسنیوز