وەزیرانی بەرگریی 13 وڵات لە هاوپەیمانیی نێودەوڵەتی دژی رێکخراوی توندڕەوی داعش لە فەرەنسا کۆ دەبنەوە.

کۆ بوونەوەکە رۆژی سێشەممە 25ـی تشرینی یەکەمی 2016 لە پاریس بە سەرۆکایەتیی ژان ئیف لۆدریان، وەزیری بەرگریی فەرەنسا و ئاشتۆن کارتەر، وەزیری بەرگریی ئەمریکا ساز دەکرێ.

بەپێی زانیارییەکان، کۆبوونەوەکە بەبێ ئامادەبوونی نوێنەری وەزارەتی بەرگریی عێراق بەڕێوەدەچێت و وەزیرانی بەرگریی هەریەکە لە وڵاتانی ئەڵمانیا، نەرویج، ئیسپانیا، ئوسترالیا، دانیمارک، بەریتانیا، هۆڵەندا، ئیتاڵیا، بەلجیکا، نیوزیلەندا و کەنەدا ئامادەی کۆبوونەوەکە دەبن.

لە کۆبوونەوەکەدا، وەزیرانی بەرگریی ئەو وڵاتانە تاوتوێی دوایین پێشهات و پەرەسەندنەکانی ئۆپەراسیۆنی رزگارکردنەوەی مووسڵ و شەڕی دژی داعش لە سووریا دەکەن.

دوای هێرشی داعش بۆ سەر کوردستانی باشوور، وڵاتانی فەرەنسا، ئەڵمانیا، ئیتاڵیا، کەنەدا، چیک، بەریتانیا، ئەمریکا، هەنگاریا و چەند وڵاتێکی دیکە بە مەشقکردن بە پێشمەرگە و ناردنی کەلوپەلی سەربازی، هاوکاریی هەرێمی کوردستان دەکەن.

لە مانگی حوزەیرانی 2014 و لە سەردەمی سەرۆک وەزیرانێتیی نوری مالیکی، دوای هەرەس هێنان و شکستی سوپای عێراق، شاری مووسڵ و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار و چەند ناوچەیەکی باشووری کەرکووک لەلایەن چەکدارانی داعش داگیر کرا.













باسنيوز