لە یەكەم رۆژی جەژندا لە سووریا 123 كەس كوژراون
سەرچاوەكان روونیان كردەوە كە هێزەكانی ئۆپۆزسیۆن هێرشیان كردە سەر سەنگەرەكانی ئەو میلیشیایانە لە ناوچەی جروود لە شارۆچكەی رەنكووس لە قەلەمونی رۆژئاوا و بەربەستی سەفایان لە ناوچەكە كۆنترۆڵ كرد كە گەورەترین بەربەستە و دەستیان بەسەر دوو تانك و دوو تۆپخانە و سێ رەشاشی قورس و لاندكرۆزێكدا گرت.
لای خۆیەوە سوپای رژێم رێگەی كاستیلۆی ستراتیژیی بڕی كە تەنیا رێگەیەكە ناوچەكانی ئۆپۆزسیۆن لە باكووری حەلەب بە شاری حەلەب دەبەستێتەوە بەوەش هێزەكانی رژێم لە رێگەكە نزیك بوونەتەوە و تەقە لە هەر هێزێك دەكەن بەكاری بهێنێت.
ئەو پێشڕەویكردنەی هێزەكانی رژێم پاش بۆردومانكردنی ناوچەی مەلاح و كاستیلۆ و شارۆچكەی حەریتان و حەیان دێت لە باكووری حەلەب لەلایەن فڕۆكەكانی رژێمەوە.
لای خۆیەوە روانگەی مافی مرۆڤ لە سووریا رایگەیاند كە وێڕای ئاگربەست كە رژێم رایگەیاندووە كەچی لە یەكەمین رۆژی جەژندا بە هۆی بۆردومانكردنی چەند ناوچەیەك لە حەما و حمس و دیمەشق و ئیدلب؛ 123 كەس كوژران.
باسنيوز
