سەرۆکی فەرەنسا داوا لە بەریتانیا دەکات، پەلە بکەن لە دەرچوونیان لە یەکێتی ئەوروپا و کات بە فیڕۆنەدەن و بەخێرایی پرۆسەی چوونەدەرەوەیان لە یەکێتییەکە جێبەجێبکەن.

فرانسوا ئۆلاند، سەرۆککۆماری فەرەنسا رۆژی دووشەممە 27-6-2016 دوای کۆبوونەوەی لەگەڵ هەریەکە لە راوێژکاری ئەڵمانیا و سەرۆکوەزیرانی ئیتاڵیا لە کۆنگرەیەکی رۆژنامەڤانیدا رایگەیاند، پێویستە بەریتانیا خێرابکات لە جێبەجێکردنی پرۆسەی دەرچوونی لە یەکێتی ئەوروپا.

سەرۆکی فەرەنسا هەروەها راشیگەیاند، بەریتانیا نابێت لە پرۆسەی چوونەدەرەوەی خاوەخاو بکات و هەروەها کات بەفیڕۆبدات، چونکە کات بە فیڕۆدان و درەنگ جێبەجێکردنی پرۆسەی دەرچوون، دەبێتە هۆی ناسەقامگیری لە ئەوروپا و هاوکات کاریگەری زۆریشی لەسەر بازاڕەکانی دەبێت.

گوتەکانی ئۆلاند لەکاتێکدایە کە رۆژی 23-6-2016 زۆرینەی بەریتانییەکان لە گشتپرسییەکدا دەنگیان بۆ دەرچوونی وڵاتەکەیان لە یەکێتی ئەوروپادا و ئێستا ئەو وڵاتە بیر لە چۆنییەتی دەستپێکردنی پرۆسەی دەرچوونی وڵاتەکەی لە یەکێتییەکە دەکاتەوە.