پۆلیسی ویلایەتی تەکساس ڕایگەیاند، لە ئەنجامی ڕووداوێکی تەقەکردن لە دەرەوەی یانەیەکی سەماکردن لەو ویلایەتە، دوو کەس کوژران و ژمارەیەکی دیکەش برینداربوون.

ئاژانسی هەواڵی ئەسۆشەییەتد پرێس لە زاری پۆلیسی ویلایەتی تەکساسی پاشووری ویلایەتە یەکگرتووەکانی ئەمریکاوە بڵاویکردەوە، ئەو دوو کوژراوە بەهۆی دەستڕێژی گولـلەوە لە دەرەوەی یانەی سەماکە کوژراون ، کە دەکەوێتە شاری فۆرد وۆرسەوە.

دانیال سیرگا وتەبێژی پۆلیس لە ویلایەتی تەکساس ڕایگەیاند، پۆلیس لە ڕووداوی تەقەکردنەکە ئاگادارکراوەتەوە و لە کاتی گەیشتنیان بینیوویانە کەسێک لە دەرەوەی یانەکە کوژراوە و یەکێکیش لەبریندارەکان لە نەخۆشخانە گیانی لەدەستداوە.

ئەو هێرشەی ویلایەتی تەکساس لە کاتێکدایە ، دوو هەفتە لەمەوبەر لە ویلایەتی فلۆریدا هاووڵاتیەکی بە ڕەگەز ئەفغانی بە ناوی عومەر مەتین هێرشێکی چەکداری کردە سەر یانەیەکی هاوڕەگەزبازەکان و ٤٩ کەسی کوشت و ٥٠ کەسی دیکەشی بریندار کرد.