30ی‌ كانوونی‌ دووه‌م/ یه‌نایه‌ر (گوڵان میدیا)- نێرده‌ی هاوبه‌شی نه‌ته‌وه‌ یه‌كگرتووه‌كان و كۆمكاری عه‌ره‌بی بۆ پرسی سووریا (ئه‌خزه‌ر ئیبراهیمی) ڕایگه‌یاند ڕژێمی به‌عسی سووریا هه‌موو شه‌رعیه‌تێكی له‌ده‌ست داوه‌ و ده‌بێت كۆمه‌ڵگه‌ی نێوده‌وڵه‌تی مامه‌ڵه‌ی توندتری له‌گه‌ڵ بكات.

(ئیبراهیمی) له‌ لێدوانێكیدا له‌ میانه‌ی كۆبوونه‌وه‌ی له‌ ئه‌نجوومه‌نی ئاساییشدا ڕایگه‌یاند ده‌بێت وڵاتانی ئه‌ندام له‌ ئه‌نجوومه‌نی ئاساییش هه‌نگاوی توندتر و ڕه‌فتاری كاریگه‌رتر دژ به‌ ڕژێمه‌كه‌ی (به‌شار ئه‌سه‌د) بگرنه‌ به‌ر، چونكه‌ ئه‌و ڕژێمه‌ كه‌ڵكی چاكسازی و چاككردنی نه‌ماوه‌ و هه‌موو متمانه‌ و شه‌رعیه‌تێكی له‌ده‌ست داوه‌.

هه‌روه‌ك داوایشی لێ كردن كه‌ به‌ هانای هاووڵاتیانی سووریاوه‌ بچن، چونكه‌ (ئه‌سه‌د) ده‌ست له‌ هیچ كه‌سێك ناپارێزێت و وڵاته‌كه‌ی له‌ كه‌ناری كاولبوون نزیك كردووه‌ته‌وه‌.