7 ی تشرینی یەكەم/ ئۆكتۆبەر (گوڵان میدیا)- ئه‌مڕۆ نزیكه‌ی 19 ملیۆن هاوولاتی فه‌نزوێللا به‌شداری پرۆسه‌ی ده‌نگدان بۆ هه‌لبژاردنی سه‌رۆكی نوێ بۆ وڵاته‌كه‌یان ده‌كه‌ن ، ده‌نگدانه‌كه‌ش له‌ نێوان دووباره‌ هه‌لبژاردنی هۆگۆ چافێز بۆ شه‌ش ساڵی دیكه‌ یان ده‌نگدان بۆ كاندیدی ئۆپۆزسیۆن ئنریكی كابریلیس رادۆنسكی ده‌بێت.

له‌لایه‌ن خۆیه‌وه‌ هۆگۆ چافێز داوای له‌ هه‌موو لایه‌نه‌ سیاسییه‌كان كرد كه‌ پێویسته‌ رازی بن له‌ سه‌ر ئه‌نجامه‌كانی هه‌لبژاردنی سه‌رۆكایه‌تی له‌ وڵات . روونیشیكرده‌وه‌ كه‌ متمانه‌م هه‌یه‌ هه‌موو شتێك به‌شێوه‌یه‌كی ئاشتیانه‌ به‌رێوه‌ ده‌چێت و هه‌موو لایه‌نه‌كانیش دان به‌ ئه‌نجامه‌ فه‌رمیه‌كانی ئه‌م هه‌لبژاردنه‌دا ده‌نێن كه‌ له‌لایه‌ن ئه‌نجومه‌نی نیشتیمانی هه‌لبژاردنه‌كانه‌وه‌ راده‌گه‌یه‌ندرێت .

ئه‌مڕۆ نزیكه‌ی 139 هه‌زار كارمه‌ندی هێزه‌ ئه‌منییه‌كان ئه‌ركی ئه‌منییه‌تی پرۆسه‌ی هه‌لبژاردن له‌ ئه‌ستۆ ده‌گرن ، فه‌نزویللاش له‌لایه‌ن خۆیه‌وه‌ سنووره‌كانی خۆی له‌ به‌رده‌م هاتوچۆكردنی ئۆتۆمبێل و هاوولاتیان داخستووه‌ و سوپای فه‌نزویللاش سه‌رپه‌رشتی پاراستنی سنووره‌كانی ئه‌م وڵاته‌ ده‌كات.

له‌م هه‌لبژاردنه‌دا به‌ ده‌یان هه‌زار چاودێری هه‌ر دوو پارت و چه‌ندین ده‌سته‌ی سه‌ربه‌خۆ و نزیكه‌ی دووسه‌د چاوه‌دێری نێو ده‌وڵه‌تی چاوه‌دێریی سندوقه‌كانی ده‌نگدان ده‌كه‌ن .