مەسیحییەكانی سووریا، دەترسن وەک مەسیحییەكانی عێراقیان لێ بێت
بەرپرسی مەكتەبی سیاسیی ڕێكخراوی ئاشووریی دیموكراتی سووریا (گبریل موشی كوری) ، لە دیمانەیەكی تایبەتی ئاژانسی هەواڵی پەیامنتێرـدا دەڵێت كە بەشداریی ڕكخراوەكەیان لە ئەنجوومەنی نیشتیمانیی ئۆپۆزسیۆنی سووریادا بەپێی بنەما و بەرنامە سیاسییەكەیەتی، كە لە دیموكراتییەت و داخوازییەكانی گەلانی سووریا و ئازادییەكانییەوە سەرچاوەی گرتووە. بەو واتایەی كە گەلی سریانی ئاشووری بڕوای وایە كە ناشێت لەژێر دەستەڵاتی سیستەمێكی دیكتاتۆری و سەركوتكار بە خواستەكانی بگات.
(موشی كوریە) ڕوونی كردەوە كە ڕێكخراوی دیموكراتیی ئاشووری لە پێناو بنیاتنانی دەوڵەتێكی عەلمانیدا كار دەكات، كە پێكهاتە جیاوازەكان (ئایینی، نەتەوەیی و كولتووری) تێیدا هەبن و ڕێز لە مافەكانی مرۆڤ بگرێت و شەراكەتی ڕاستەقینە لەسەر بنەمای دادپەروەری و یەكسانیی بەرجەستە ببن. لەسەر ئاستی نەتەوەییش خوازیارن دەستوور دان بە مافەكانی كلد و ئاشوور وەك نەتەوەیەكی ڕەسەن، زمان و كولتوورەكەی وەك زمان و كولتووری نیشتیمان لێی بڕوانرێت و كۆی مافەكانی وەك هیی گەلانی دی دەستەبەر بن.
ئەو لە وەڵامی ئەوەدا كە شۆڕشی بەهاری عەرەبی چ ترسێكی لای كەمینە نەتەوایەتییەكان پێك هێناوە گوتی كە ئەم ترسەی كە باسی لێوە دەكرێت بە تەنیا لای كەمینە نەتەوەكان نییە، بەڵكە زۆرێك لە ڕۆڵەكانی زۆرینەیش هەمان سەرنج و ترسی هاوشێوەی ئێمەیان هەیە.
بە بڕوای (كوریە) ترسی كەمینە نەتەوەكان بە تایبەت مەسیحییەكان، لە پەراوێزخستن و داننەنان بە مافەكانیان، كە لە زەینی هاووڵاتیانیان پەنگ دەخواتەوە، بەشێكی زۆری ترسێكی دروست و بەجێیە. ئەو دەڵێت کە زۆرێك ئەم ترسە بە ئەزموونی عێراقەوە دەبەستنەوە كە مەسیحییەكانی ئەو وڵاتە بە چ قۆناخێكی تاڵ و كارەساتباردا تێپەڕ دەبن. بە شێوەیەكی ڕێژەییش ترسمان پێوەندیی بە ئەزموونی میسرەوە هەیە لەو گرژی و ئاڵۆزییەی لە نێوان موسڵمان و قیبتییەكاندا هەیە.
ئەو سەركردە ئاشوورییەی ئۆپۆزسینی سووریا، پێی وایە كە خۆبەدەستەوەدان و گۆشەگیربوون لە ترس، ڕێگەچارەی گەنجاو و باش نییە و هیچ گەرەنتییەكیش بۆ دەستەبەری مافەكان نابێت. بۆیە دەبێت كە كەمینە نەتەوەكان بەیەكەوە و بەپێی نەخشەی گەنجاو و سەردەمییان لەپێناو بنیاتنانی بنەماكانی دیموكراتییەت ڕۆڵیان هەبێت.
