وهكی خهیال دبيته نان
شھاب ئاکرەیی
ل وهلاتهكی كو تێدا چاڤەڕێ بوونا مووچهی زۆر درێژ دبیت، و خهون تێدا دهێنه پاشئێخستن وهكی چهوا پهیمان دهێنه پاشئێخستن، ههژاری نامینیت بتنێ كێمبونا سامانی، بهلكو هێدی هێدی دبيته رەوشهك كو دل و گیانی داگیر دكهت.
وهكی بێبههربوون درێژ دكێشیت، مرۆڤ ل پهنجهرهیهكێ دگهریت دا بێنێ ژێ بههلكێشیت، ههكه ئهو پهنجهره ل سهر دیواركی ژی هاتبه كێشان، ئهو مێشكێ دهمهكێ درێژ ل ژێر گوشارا پێدڤیبوونێ دژیت، ههردهم ل راستیهكا زۆر دروست ناگهریت، بهلكو ل وێ هزرێ دگهریت يا پتر بشێت ئهشكهنجه و ئێشێ كێم بكهت، لەوڕا خهیال ههندهك جاران دبيته زمانهك بۆ ههلهاتنێ، نه نیشانا لاوازیا مێشكی، ئهو بزاڤهكا دهستپێكی یه بۆ زڤراندنا كۆنترۆلێ ل سهر ژیانهكێ كو خودانێ وێ ههستكرنا ب گرتنا جلهوێن وێ ژ دهست دابیت.
و وهكی مرۆڤ نهشێت واقعێ خۆ بگوهرێت، چێدبیت شروڤهكرنا خۆ بۆ واقعی بگوهرێت، ڤێجا ناڤهكێ جوان ددهته بێدهستهلاتيێ، و مهرهمهكێ ددهته هێڤیكرنێ، و پهیمانهكا نوی ددهته نائۆمێدیێ،
لەورا چێدبیت خهیال، ل وان جڤاکان ئهوێن هەژارییا سیاسی و ئابۆری ماندی كرین، پتر بشێت بمینیت ژ راستیێ، چنكی راستی پێدڤی ب دامودهزگه، دادپهروهری، پهروهرده، دهرفهت، و دهمهكێ درێژه دا كو خۆ بسهلمینیت، لێ خهیالێ، بتنێ پهیمانهكا جوان، دهنگهكێ دلنیاكهر، و وێنهیهك بۆ پاشهرۆژهكا نههێت بهسه بۆ وێ.
برسی خهیالێ ناكڕیت چۆنكی ئهو یێ بێئاقله، بهلكو چۆنكی بۆ دهمهكێ درێژ ژ راستیێ هاتيه بێبههركرن، و وهكی واقع نهشێت ئارامیێ پێشكێش بكهت، هێڤیا دروستكری دبيته جێگر بۆ وێ، ل ڤێرێ مهزنترین و مەترسیترین چیرۆك دهستپێدکەن: وهكی چاڤەڕێکرن و هێڤیكرن دبيته كهلتوور، و بهێنفرههی دبيته قهدهر، و خهون دبيته ئامرازهك بۆ پاشئێخستنا پرسیارێ ل سهر سوباهی.
ل عیراقێ، و ل ههرێما كوردستانێ، نهوەیێن تهمام ل ناڤبهرا قهیرانێن ل دووڤ ئێك دا ژیاینه، و ل ناڤبهرا واقعهكی كو داخوازا بهێنفرههیێ ژ وان دكهت ههر جارا ژیان ل وان تهنگ ببیت، و ب دوبارهبوونا نائۆمێدیان، مرۆڤ پتر ئاماده دبيت بۆ خۆڤهگرێدانێ ب ههر مهرهمهكێ كو ههستا هندێ بدهتێ كو سوباهی یا جودایه، ههكه ئهو مهرهمه وهكی کادیێ ژی یا سست بیت، و ل ڤێ بیاڤێ ب دروستی نێزیكاتییا ناڤبهرا وێ چهندا ئهم حهز ژێ دكهین و وێ چهندا ئهم ههژینە بهرفرههـ دبيت، و ناڤبهرا وێ چهندا بۆ مه دهێته گۆتن و وێ چهندا ئهم ب چاڤێن خۆ دبینین، و چهند ئهڤ بیاڤە بهرفرههـ ببیت، خهیال زاناتر دبيت ل سهر کرنەبەرا جلێن راستیێ، و راستی ژی ههندهك جاران ئێشێنهرتر دبيت.
بهلێ گرفتاری نه بتنێ ل جهم مرۆڤێ ههژاره. چۆنكی ههژاری وهكی درێژه بكێشیت، پێدڤی ب ژینگهههكێ يه كو خهیالێ بەرههم بینیت و پاراستنێ ل سهر بكهت، و وهكی پهروهردیا هزركرنا رهخنهگر لاواز دبيت، و پرسیار دبيته بارهكێ گران، مێشك دبنه عهردهكێ بهرههمدهر بۆ ههر تشتهكێ كو پهیمانا قورتالكرنا بلەز بدهت.
گهل ڤێ ژی، نابیت ههژاری ببێته حوكمهكێ ههتاههتایی ل سهر مرۆڤی، چۆنكی جڤاک ژ خهیالێن خۆ رزگار نابن ب ترانهكرنێ ب خهونێن وان، بهلكو ب دانانا ئهگهرێن راست بۆ خهونێ، ئهو پهروهردیا مێشكی ڤهدكهت، و ئهو دادپهروهریا باوهریێ دزڤڕینیت، و ئهو دهزگههێن كهرامهتێ دپارێزن، و ئهو ئابۆريێ دهرفهتێ ددهته مرۆڤی نه كو خێرهكێ؛ ئهڤه ههمی دشێن خهونێ ژ جیهانا خهیالێ بزڤڕینن بۆ جیهانا تشتهكێ کو چێدبیت.
رهنگه مرۆڤێ ههژار پێدڤی ب كهسهكی نهبیت ترانهيان ب خهونا وی بكهت، بهلكو پێدڤی ب كهسهكی یه هاريكارییا وی بكهت دا ببیتە راستی، و دهمێ نان بهردهست دبيت، و كهرامهت دبيته ماف، و پاشهرۆژ دبيته پڕۆژه، هینگی بتنێ خهیال شیانا خۆ ژ دهست ددهت كو ببیته نان.
