ئێمەی كورد وەك نەتەوەیەك، خاوەنی خەون و خەیاڵێكی زۆرین بۆ بەدیهێنانی سەربەخۆیی و ئازادی، لەم پێناوەشدا هەموو توخمە سەرەكییەكانی نەتەوەبوونمان تێدایە، خاكێكی دیاریكراو و زمانێكی دەوڵەمەند، واقیعێكی جوگرافیی جیاواز و مێژوویەكی دێرین، بەڵام كێشە گەورەكە لەوەدایە كە ئەم جوگرافیا سرووشتییەی ئێمە دابەش كراوە بەسەر چوار دەوڵەتدا كە نە لە ڕووی زمان و نە لە ڕووی فەرهەنگەوە هیچ هاوبەشییەكیان لەگەڵماندا نییە. ئەم دابەشكارییە مێژوویی و سیاسییە بەربەستێكی هێندە سەخت و ئاڵۆزی لەبەردەمماندا دروست كردووە، كە تاوەكو ئەمڕۆش نەمانتوانیوە وەك گەلێكی سەربەخۆ پێگەی شایستەی خۆمان لە جیهاندا بدۆزینەوە، یان لانی كەم هەنگاوێكی كردەیی و كاریگەر بەرەو پێشەوە بنێین. ئەم دۆخە وا دەخوازێت كە بە قووڵی و بە شێوازێكی واقیعی سەیری كێشە نەتەوەییەكەی خۆمان بكەینەوە و تەنیا لە گۆشەنیگایەكی سۆزدارییەوە لێی نەڕوانین.

كێشەی سەرەكیی ئێمە ئەوەیە كە بەردەوام هۆكاری سەرجەم شكست و نەهامەتییەكانمان دەخەینە ئەستۆی نەیار و داگیركەرانمان، بێگومان داگیركەر هەرگیز خێری بۆ ئێمە ناوێت و سرووشتی ئەو وەك لایەنێكی دەستبەسەرداگر، گفتوگۆ و ددانپێدانان نییە بە مافەكانماندا، بەڵام پرسیارە جەوهەرییەكە ئەوەیە: ئێمە خۆمان لە كوێی ئەم جیهانە هاوچەرخەدا وەستاوین؟ لە سەردەمێكدا كە مرۆڤایەتی لە ڕووی زانست و تەكنەلۆژیا و فیكرەوە گەیشتووەتە ئاستێكی هێندە بەرز، ئایا پێگەی فیكری و زانستیی ئێمە لە كوێدایە؟ ئایا بەم پەرتەوازیی و ناكۆكییە ناوخۆییانەی كە لەناوماندا هەیە، دەگەینە هیچ كوێ؟ ئایا بەم جۆرە ململانێیە ناوخۆییانە و بەم عەقڵییەتە دەتوانین سەركەوتوو بین؟ وەڵامەكەی بێگومان نەرێنییە، مەگەر ئەوەی گۆڕانكاریی ڕیشەیی لە زیهنییەت و فیكری خۆماندا بكەین.

كاتی ئەوە هاتووە لە هەر شوێنێكی ئەم جیهانەدا بین، بە خۆماندا بچینەوە. جیهانی ئەمڕۆ بە زمانی زانست، لۆژیك و بەهێزكردنی تواناكان دەدوێت، نەك تەنیا بە گوتاری سۆزداریی بێ كردار. ئێمە هێزی مرۆیی و جوگرافیی باشمان هەیە، بەڵام ڕێژەی نەخوێندەواری و ناڕۆشنبیریش لەناو كۆمەڵگەكەماندا كەم نییە. لەم نێوەندەشدا سیاسەتمەدارەكانمان بەداخەوە نەیانتوانیوە ببنە جێگەی ئومێد و لە ئاستی پێویستی سەركردایەتیكردنی پڕۆژەیەكی نیشتمانیی گەورەی وەك سەربەخۆییدا نین. هۆكارەكانی ئەم دەستەپاچەییە زۆر و جۆراوجۆرن، بەڵام یەكێك لە ڕێگە چارەسەرە سەرەتاییەكان ئەوەیە كە لانیكەم گرنگی بە پەروەردەیەكی ڕاستەقینە و نیشتمانی بدەین لەناو خێزان و قوتابخانەكانماندا بۆ منداڵەكانمان. دەبێت نەوەی داهاتوو بە شێوازێك گۆش بكرێن كە كاتێك گەورە دەبن، وەك نەوەی ئێمە ڕووبەڕووی دڵەڕاوكێ، سەرلێشێواوی و بێچاوەڕوانی نەبنەوە.

كاتێك سەیری واقیعی ئێستا دەكەین، ناچارین بپرسین: ئایا بەم واقیعە پڕ لە ململانێ و پەرتەوازییەوە چۆن دەتوانین ڕووبەڕووی چوار دەوڵەت ببینەوە؟ ئایا ئەمە كەی ڕوودەدات و چەند ساڵی دیكە دەخایەنێت؟ ١٠یان ٢٠ یان ١٠٠ ساڵی دیكە؟ ئەگەر بەم ئاراستەیەی ئێستا بڕۆین، من زۆر گەشبین نیم بەوەی لە ئایندەیەكی نزیكدا ئاڵای كوردستانێكی ئازاد لە نەتەوە یەكگرتووەكاندا لە تەك ئاڵای وڵاتانی دیكەدا بشەكێتەوە. پاراستنی خەونی سەربەخۆیی پێویستی بە هەنگاوی كۆنكرێتی هەیە، چونكە خەون بەبێ ستراتیژ و كاركردن تەنیا وەك خەیاڵێكی بەتاڵ دەمێنێتەوە.

سەرەڕای هەموو ئەم نائومێدییانەی كە لە دۆخی سیاسی و كۆمەڵایەتیی ئێستاماندا دەیبینم، بەڵام هێشتا بێئومێد نیم لە نەوەی داهاتوو. من بڕوایەكی تەواوم بە توانای گەنجان هەیە كە لە قۆناغەكانی داهاتوودا پێشەوایەتیی گۆڕانكاریی ڕاستەقینە بكەن و كۆمەڵگە لەم چەقبەستووییە ڕزگار بكەن. كاتی ئەوە هاتووە كە لایەنە ناكۆكەكانی نێو ماڵی كورد بێنە سەر مێزی گفتوگۆ و لۆژیكی سیاسی بكەنە بنەمای كارەكانیان و لەگەڵ یەكتردا ڕێك بكەون. ئەگەر بەم عەقڵییەتە ناتەندروستەی ئێستاوە بەردەوام بین، ڕەنگە بۆ ٣ هەزار ساڵی دیكەش نەگەینە ئامانجی خۆمان و نەبینە خاوەن قەوارەیەكی سەربەخۆ. ئێمە وەك میللەتێك، خاوەن ڕەسەنایەتییەكی مێژوویین كە لە زۆر ڕووەوە توانامان لە گەلانی دی كەمتر نییە، بەڵام نەبوونی ستراتیژێكی هاوبەش، هەروەها عەقڵییەتی پەرتەوازە لە ناوخۆدا تەنیا زیانی بە خۆمان گەیاندووە. ئومێدەوارم هەر تاكێك، ڕۆشنبیرێك و بەتایبەت دەسەڵاتداران بە قووڵی پێداچوونەوە بە هەڵوێست و كارەكانیدا بكەن، چونكە مێژوو بە بێدەنگی تێپەڕ نابێت و سبەی نەوەكانی داهاتوو دادوەریمان بەسەردا دەكەن و لێپرسینەوەمان لەگەڵدا دەكەن دەربارەی ئەو دەرفەتانەی كە لەدەستمان داون.