هونەرمەند دلبەر جزیری بۆ گوڵان:وەك ئەركێك دەمەوێت زیاتر لەسەر زمانەكەی خۆم كار بكەم
خانمە هونەرمەندی لاو «دلبەر جزیری» سەرەڕای ئەوەی گرنگییەكی زۆر بە هونەری ڕەسەنی كوردی دەدات، لە هەمان كاتدا بایەخێكی زۆر بە مۆسیقای كوردیش دەدات. ئەو لەڕێگەی سۆشیاڵ میدیاوە هەمیشە لەگەڵ هەواداران و حەزژێكەرانی دەنگی لە پەیوەندیدایە. لە دەرفەتێكدا چەند پرسیارێكمان ئاراستە كرد .
*ڕەوشی هونەری كوردی لە ئێستادا چۆن دەبینیت؟
-بە بڕوای من ڕەوشی كولتوور و هونەری كوردی، سەرەڕای نەبوونی دەرفەت و كەرتی تایبەت، دەتوانین بڵێین لە ئاستێكی زۆر باشدایە. ناكرێت كورد بە وڵاتانی ئازاد و سەربەخۆ بەراورد بكەین. ڕاستییەك هەیە كە ئێمە لە ناو سیستمی جیهانیدا نەتەوەیەكی فەرمی نین، بۆیە سەركەوتنەكانمان هەمیشە لەسەر عێراق، ئێران، سووریا و توركیا هەژمار دەكرێن. نابێت ئەمە لەبیر بكەین؛ هەرچەندە ڕۆشنبیر و هونەرمەندانی خۆمان بچووك بكەینەوە، وەك نەتەوەش دەبینە هیچ، بۆیە پێویستە وەك نەتەوەیەكی هۆشیار قەدری یەكتری بگرین.
*پێویستە هونەرمەندانی كورد چی بكەن بۆ پێشخستنی هونەری كوردی؟
-من دەڵێم هونەرمەندانی كورد بەپێی دەرفەتەكانیان كاری زۆر باش دەكەن، گەورەترین داواكاریی من ئەوەیە كە دەست لە گلەیی و گازندە هەڵبگرین و خەیاڵی گەورە بكەین. با زۆر لە دەوروبەری خۆمان بكەین و بەدوای خەیاڵەكانماندا بڕۆین، نەڵێین كەس تێناگات یان میللەت ئامادە نییە. ئێوە بەرهەم بهێنن، ئەگەر ئەمڕۆش نەبێت، لە ساڵانی داهاتوودا ئەو بەرهەمانە دەبینرێن و قەدریان دەگیرێت.
*كێشەكانی هونەری كوردی چیین؟
-گەورەترین كێشە ئەوەیە كە خۆمان و دەوروبەرمان زۆر بچووك دەبینین، پێویستە لە سەرەتادا بڕوامان بە خۆمان و دەوروبەرمان هەبێت، بایەخ بە دەوروبەر بدەین و پۆزەتیڤ بین، كار لەسەر كەمكوڕییەكانمان بكەین و هاوكاریی یەكتری بكەین و نەهێڵین كەس ناحەقی ببینێت.
*كاریگەریی تەكنەلۆژیا لەسەر هونەری كوردی ئەرێنی بووە یان نەرێنی؟
-لە ڕاستیدا تەكنەلۆژیا بۆ ئێمە زۆر باشە، مرۆڤ دەتوانێت بە تەلەفۆنێك بگاتە ئەو پەڕی دنیا، بەڵام پێویستە خۆمان ڕابهێنین كە تەكنەلۆژیا بۆ بەرژەوەندیی خۆمان و میللەتەكەمان بەكاربهێنین و، تەنیا لەڕێگەی سۆشیاڵ میدیاوە دەكرێت شۆڕشێك بەڕێوە ببەیت. مرۆڤ نابێت لە تەكنەلۆژیا ڕابكات یان لێی بترسێت، بەڵام نابێت كۆنتڕۆڵی خۆشی لەدەست بدات.
*بە بڕوای ئێوە كەی هونەرمەندی كورد دەتوانێت لەڕێگەی هونەرەوە ژیانی خۆی مسۆگەر بكات؟
-بڕوام وایە ئێستا مرۆڤ ناتوانێت بە ئاسانی لەڕێگەی مۆسیقاوە ژیانی مسۆگەر بكات، ئەمە بە سیستمێكەوە بەستراوەتەوە، ئەو سیستمەش بەبێ دەوڵەتبوون قبووڵت ناكات. بەداخەوە دەوڵەتێكی سەربەخۆشمان نییە.
*تا چەند گرنگی بە سۆشیاڵ میدیا دەدەیت؟
-پێشتر زۆر گرنگیم بە سۆشیاڵ میدیا نەدەدا، بەداخەوە ئێستا بەهای هونەرمەندان بەپێی ژمارەی فۆڵۆوەر (شۆپێنەر) دیاری دەكرێت، منیش ئێستا هەوڵ دەدەم لە پەیجی فەرمیی خۆم چالاك بم، بەڵام بێگومان هەندێك كەس فۆڵۆوەر دەكڕن، من بە شەخسی نامەوێت ئەو ڕێگەیە هەڵبژێرم و دەمەوێت فۆڵۆوەرەكانم ڕاستەقینە بن، بەكارهێنانی سۆشیاڵ میدیا بۆ من كەمێك زەحمەتە و بۆ فۆڵۆوەرەكانیشم شتێكی نوێیە.
*ئایا هونەرمەندانی كورد لەڕێگەی زمانەكانی دیكەوە (عەرەبی، فارسی، توركی) دەتوانن زیاتر خزمەت بە هونەری كوردی بكەن؟
-بەپێی ئەوەی دەیزانم، ئەگەر هونەرمەندێكی كورد بە زمانێكی بیانی گۆرانی بڵێت، خزمەت بەو زمانە دەكات، بەڵام دەكرێت وەك هونەرمەندێكی كورد بناسرێت ئەگەر خۆی وەك كورد بناسێنێت. من ڕەخنە لە كەس ناگرم كە بە عەرەبی، فارسی یان توركی دەخوێنێت، بێگومان ئەو كەسە دەتوانێت بارودۆخی خۆی باشتر بكات و دەرفەتی باشتر ببینێت، بەڵام من وەك ئەركێك، دەمەوێت زیاتر لەسەر زمانەكەی خۆم كار بكەم.
