پڕۆژەكە بەگشتی(31%)و بەشی فیزیكییەكەی(85%)و بەشی مەدەنییەكەشی(70%)ی تەواوبووە

پڕۆژەی ئاوی گۆپتەپە - چەمچەمال بە دوو قۆناغ جێبەجێ دەكرێت لە هەر قۆناغێكیدا(3400)مەتر سێجا لە كاتژمێریكدا ئاو دابین دەكات

پڕۆژەی ئاویخواردنەوەی گۆپتەپە - چەمچەمال یەكێكە لەو پڕۆژە ستراتیژیانەی كە چەندین ساڵە كار بۆ جێبەجێكردنی دەكرێت و لە چەندین كات و قۆناغدا بەهۆی قەیرانی دارایی و نەبوونی بودجە پڕۆژەكە  ڕاگیراوە، بەڵام ڕێزدار مسرور بارزانی سەرۆكی حكومەتی كوردستان وەكو ئەوەی جەختی لەسەر جێبەجێكردنی هەموو پڕۆژە خزمەتگوزارییەكان بەتایبەتی ئاویخواردنەوە بۆ هەموو شارو شارۆچكە و گوندەكانی هەرێمی كوردستان كردۆتەوە بڕیاریدا ئەو پڕۆژە گرنگ و گەورەیە بۆ چەمچەمال و ناوچەكەی تەواو بكرێت و بودجەشی بۆ تەرخانكرد، وەكو گوڵان بە پێویستمانزانی بەدواداچوونێك بۆ پڕۆژەكە بكەین بۆ ئەوەی بۆ هاوڵاتیان ڕوونبكرێتەوە كە پڕۆژەكە لە چ قۆناغێكە و كەی تەواو دەبیت بۆ ئەو پرسیار و چەندین لایەنی دیكە ئەندازیار ئاری حەمەد قادر بەڕێوەبەری گشتی ئاوو ئاوەڕۆی هەرێمی كورددستان، بەو جۆرە وەڵامی دایەوە.

·      ئایا پڕۆژەی ئاویخواردنەوەی(گۆپتەپە – چەمچەمال) لە جێبەجێكردن بەردەوامە و، لە چ قۆناغێكدایە و توانای پڕۆژەكە لە دابینكردنی ئاویخواردنەوە چەندە؟

-       کاركردن لە پڕۆژەی ئاوی گۆپتەپە - چەمچەماڵ بەردەوامە، تاوەکو ئێستا لە پڕۆژەکەدا کارەکان بە باشی بەڕێوەدەچن، پڕۆژەكە بەگشتی لە(31%)ی تەواو بوووە، بەڵام  لە بەشی فیزیکی، کارەکان لە سەدا هەشتا و پێنجی تەواو بووە، لە بەشی مەدەنییەكەشی کارەکان لە سەدا حەفتای چۆتەپێش. هاوكات لە بەشی کارەبا ئەوە کارەکان دەستی پێکردووە و كەلوپەل و پێداویستی کارەباکانی پڕۆژەكە گەیشتۆتە شوێنی پڕۆژەكە. هەروەها لە(58)كیلۆمەتر بۆڕی كە درێژی و هێلی سەرەكی پڕۆژەكەیە تا ئێستا یازدە کیلۆمەتر بۆری تیرە ٩٠٠ ملم هاتووە. هەروەها زۆربەی ئەو بابەتانەی پەیوەستن بە بەشی میکانیک و کارەبا، گرێبەستیان بۆ ئەنجامدراوە و پڕۆژەکە وەك بڕیارە لەم ساڵەدا(2026) تەواو دەبێت. بێگومان  پڕۆژەکە گرنگ و ستراتیژییە، بە دوو قۆناغ تەواو دەكرێت كە لە قۆناغی یەکەمدا(3400)مەتر سێجا لە كاتژمێرێكدا ئاو دابین دەکات کە ئەمەش توانای دابینکردنی ئاوە بۆ زیاتر لە(250)هەزار هاووڵاتی لە چەمچەماڵ و تەکیە و ڕزگاری. هەروەها قۆناغی دووەمیش بە هەمان شێوە(3400)مەتر سێجا لە كاتژمێرێكدا دەبێت كە ئەمەشیان زیاتر تایبەتمەند دەبێت بەو گوندانەی دەوروبەری چەمچەماڵ و چەند ناحیەیەکی تر لە سنوورەكەدا. سەرچاوەی ئاوی پڕۆژەی(گۆپتەپە – چەمچەمال)ئاوی زێی بچوكە و دابینكردنی ئاویخواردنەوە لە پڕۆژەكەدا بە کوالێتییەکی زۆر باشە و بەپێی ستانداردە عێراقی و نێودەوڵەتییەکان و ڕێكخراوی(WHO)دەبێت. هاوكات پێویستە ئاماژە بەو بەشە گرنگەی پڕۆژەكەش بكەین كە کەرتی فیزیکییە وەك(بەشی شۆردن، بەشی مەدەنی، بەشی خزمەتگوزاری و چەندین بواری دیكە)كە لە ئێستادا تەواو بووە،هەروەها وەكو لە پێشتریش ئاماژەمانپێدا كە كەرستەو  و تاوەرەكانی كارەبای پڕۆژەكە دابینكراون و لە شوێنی پڕۆژەكە ئامادەكراون. و ئیشوکارەکان و زۆربەی ئەو بابەتانەی کە پەیوەستن بە لایەنی میکانیکی و کارەبایی گرێبەستیان بۆ کراوە. لە لایەكی دیكەوە پڕۆژەکە وەك بڕیارە لە کۆتایی ئەم ساڵەدا(2026)ئەگەر کێشە و گرفت بەتایبەتی لایەنی دارایی بۆ دروست نەبێت، تەواو دەبێت.هەر چەندە  ئەم پڕۆژەیە پڕۆژەیەکی گەورەو ستراتیژییە، بەڵام هەوڵ و كارەكان بەو ئاست و ئاڕاستەییە تا کۆتایی ئەم ساڵ پڕۆژەكە تەواو ببێت و ئاوی پاك بگاتە خزمەتی هاوڵاتیانی ئازیزی شار چەمچەماڵ و ناحیە و گوندەكانی دەوروبەرو سنوورەكە.