مەریەم پیربەند بۆ گوڵان:سینەمای كوردی دەرفەتی كاركردنی زیاتری لەبەردەمە

بە بڕوای ئەم دەرهێنەرە، جیاوازیی سەرەكیی نێوان سینەماكارانی ڕۆژهەڵات و ئەمریكا لە تەكنەلۆژیادا نییە، بەڵكو لە شێوازی چیرۆكگێڕانەوەدایە. لە كاتێكدا فیلمە كوردی و ئێرانییەكان لەسەر بنەمای بەهای مرۆیی و چیرۆكی قووڵ دروست دەبن، هۆڵیوود خاوەنی سیستمێكی كاری پڕۆفیشناڵ و ستانداردە. پیربەند باس لەوە دەكات كە هەرچەندە هۆڵیوود ڕەنگە ئەو گەنجینە دەوڵەمەندەی چیرۆكی وەك ڕۆژهەڵاتی ناوەڕاستی نەبێت، بەڵام لە چۆنیەتی گێڕانەوەی چیرۆكدا زۆر شارەزان، هەر بۆیە ئەو خۆی هەوڵ دەدات چیرۆكە ناوخۆییەكان بە فۆرم و ستانداردی جیهانی بنووسێتەوە..

سەبارەت بە سینەمای كوردی، پیربەند بە سەرسامییەوە دەڕوانێتە كوردستان و پێی وایە، كوردستان گەنجینەی چیرۆك و سیناریۆی سینەمایە، ئەو دەستخۆشی لەو كارە كوردییانە دەكات كە توانیویانە تراژیدیا و ئازارەكان بگوازنەوە، وەك فیلمی «كیسەڵەكان دەفڕن»ی بەهمەنی قوبادی، بەڵام پێی وایە هێشتا بواری زیاتر ماوە بۆ كاركردن. پیربەند ئاماژە بە هەوڵێكی خۆی دەكات بۆ گەیاندنی ئازارەكانی كورد بە هۆڵیوود لە ڕێگەی سیناریۆیەكەوە، چونكە بڕوای وایە چیرۆكە مرۆییەكانی كورد سەرنجڕاكێشن و شایەنی ئەوەن لەسەر ئاستی جیهانی بناسرێن. لە كۆتاییدا، هەرچەندە كاریگەریی سینەمای ئێران لەسەر سینەمای كوردی لە ڕابردوودا بەدی كراوە، بەڵام ئەو پێی وایە سینەمای كوردی خاوەن ناسنامە و چیرۆكی تایبەت بە خۆیەتی.

لەزۆربەی كارەكانیدا پیربەند باس لە دایكانی گەنج دەكات كە هەندێك كێشەیان هەیە، لەم بارەوە دەڵێت: «من ئەزموونی دایكایەتیم نییە، بەڵام زۆر كاریگەریی لەسەر هەبووە، ئەگەر كێشەیەكت هەیە لە كۆمەڵگەیەكی وەك ئێران یان عێراقدا كە هەندێك سنوور و گڵۆپی سووری لەسەرە، چۆن دەبێت كاتێك منداڵت دەبێت یان دووگیانیت؟ خراپترین شت دێتە ڕێت، چۆن دێت كاتێك كێشەكە بە تەواوی پەیوەندیی بەو منداڵەوە هەیە؟ دایكایەتی شتێكی ترە، پەیوەندیی بە بەرپرسیارێتی و خۆشەویستییەوە هەیە، كەواتە بینەرانم بەهێزتر دەتوانن هەست بە پرسەكە بكەن».

هەروەها دەڵێ: «بڕوام وایە ئەوەی ئافرەتان لە ڕۆژهەڵاتی ناوەڕاستدا هەنگاوی گرنگیان ناوە، ئەمەش نیشانەی ئەوەیە كە دەتوانین ئەم شتانە بگۆڕین بە بوون، بۆ نموونەی تەواو كە هەموو كەسێك دەتوانێت لەو بوارانەی كە ئارەزووی دەكات سەركەوتن بەدەست بهێنێت و جیهان بەبێ پرس بەردەوام دەبێت، من دەمەوێت ببینم كچان نەك هەر مافە سەرەتاییەكانیان هەبێت، بەڵكو ژیانی خۆیان بە تەواوی بژین، بەدوای خەونەكانیاندا بگەڕێن و خۆیان شانازی بكەن».