(ئەفلاتون) فەیلەسوفی یۆنانی دەڵێ"هەموو سەرەتایەك كۆتاییەكی هەیە، وە ئەو كۆتاییە بریتییە لە سەرەتایەك بۆ شتێكی تر".
چەند كاتژمێرێكی تر ساڵی (٢٠٢٥)تەواو دەبێت و لە كۆتا ڕۆژ و كاتژمێرەكانی تەواو بوون و بەڕێكردنی ساڵی (٢٠٢٥)داین، هەروا تەماشای نەكەین كەوا كۆتایی ساڵە و تەواو، بەڵكو گرینگە و وا پێویست دەكات كۆتاییەكانی ساڵی (٢٠٢٥)كۆتایی هاتنی و بەڕێكردنی هەموو شتە ناخۆش و ژان و ئازار بەخشەكان بێت، وا بكەین هەموو ئێش و ئازار و ڕق و كینە و ئیرەیی و هەموو ئەو شتانەی ئێمەیان ئازارداوە و دڵیان ئێشاندووین لەگەل (٢٠٢٥) دا بڕۆن و بوون و شوێنەواریان نەمێنێ .
كۆتایی (٢٠٢٥) كۆتایی هەموو ئەو شتە ناشیرینانە بێت كە لێیان بێزار بووین، خۆمان بگۆڕین بەرەو باشتر و باشتر. جەخت لە سەر ئەوە بكەینەوە وردبینەوە و تێرامێنین لە سەر ڕۆژ و مانگەكانی (٢٠٢٥) و تێفکرین و بزانیین كارو دەستكەوت و چاكەكانمان چی بوون و پێداچوونەوەی وردی خۆمان بكەین، لە ناخەوە تێڕامێنین و تێڕامان و وردبوونەوەی خودی خۆمان و هەڵسەنگاندنێكی ورد بۆ تەواوی ساڵەكە بكەین بە ئەرێنی و نەرێنیەكان، بە گەش بینی و دڵخۆشییەكی زۆر و شانازییەوە سەیری دەستكەوت و كردار و بەرهەمەكان بكەین، بەراوردێكی خێرای خۆمان بكەین لەگەڵ ساڵ و مانگەكانی(٢٠٢٥) چۆن پەرەمان بەخۆمان داوە و هەوڵەكانمان لە پێناو چاكە و سوود و قازانجی گشتیی و دڵخۆشی چی بوون، شانازی بكەین دڵخۆش بین بەوەی لە پێشتر و پێشتر زیاتر بەرەوپێش چووینە و سوود و قازانج و چاكەمان زیادی كردووە و ئازار و ڕق و قینەمان بەرامبەر ئەوانی تر نەبووە و زیاتر لە خۆمان نزیكتر بووینە و هەستمان بە بوونی خۆمان كردووە و گرنگیمان بەخۆمان داوە وەک کەسێکی سودبەخش و ئاسودە و بەرەو ئاسودەیی و پەرەپێدانی زیاتر و سوودگەیاندنی زیاتر و زیاتر، لەگەڵ دیاریكردنی پلان و ئامانج بە تێكەڵە و ئاوێتەیەكی خەست لەگەش بینی و دانایی و دووربینی لە كار و كردار و لە هەمان كاتدا دەبێ ئەوپەڕی سوپاسگوزاری خودای گەورە و بەخشندە بین و هەمیشە سوپاسگوزاری خودا بین لە سەر هەموو ئەو شتانەی كە هەمانە سەرەتا كەسەكان و خێزان و خۆشەویستان و هەمووچركە ساتە خۆش و جوانەكانی ساڵی بەسەر چوو. فێربوون و زانین لە هەڵەكان بكەینە بنەمایەك بۆ زاڵ بوون بەسەر كێشە و ئاستەنگەکان وەكو وانە و پەند تەماشای بكەین، نەك كەوتن و دۆڕان هەمووی فێربوونە و سوودی دەبێت بۆ داهاتوومان. هەمیشە بە گەشبینی و ئومێدەوە سەیری داهاتوو بكەین و لە ڕابردوو فێرببین و بەردەوام پەرە بە خۆمان بدەین، لە سەر پێیەكان بوەستین و گەورەترین دەستكەوتمان ئەوەیە بە جێگیری و قایمی وەستاوین و بەرەوپێشەوە دەڕۆین و سەرەڕای هەموو ئاستەنگییەك جەخت لە سەر بەردەوامی بكەینەوە و بەردەوام بین و زیاتر و زیاتر بەرەوپێشەوە بڕۆین، باشتر بین و ئاسودەتر بین و ویژدانمان حەساوەتر بێت و جەختی زیاتر لە سەر ئەرێنی و شتە باشەكان بكەینەوە. هەمیشە نیاز و نیەتمان باش بێت خودای گەورەش باشی دەهێنێتە پێشمان. گرینگە ساڵی (٢٠٢٥) زۆر شتی فێركردبین، هەمیشە گەشبینبین و بە ئومێدەوە بژین و باشتر و باشتر چاوەڕێمان دەكات.

ڕاوێژكار لە وەزارەتی پەروەردە
ماستەر لە كارگێڕیی پەروەردەیی