یانەی وەرزشی زانكۆی جیهان قوتابخانەیەكی بەرزكردنەوەی قورسایی كچان دەكاتەوە
تیپی بەرزكردنەوەی قورسایی كچانی یانەی زانكۆی جیهان دوای ئەوەی توانیان نازناوی یانەكانی سنوری پارێزگای هەولێر بەدەست بهێنین و سێیەمی كچانی یانەكانی عێراقیشیان بردەوە لە ئێستادا تیپەكە چۆتە قۆناغێكی تازەی كێبڕكێ یانەكانی تری كوردستان بە حوكمی ئەوەی زۆربەی یاریزانانی یانەكە یاریزانی هەڵبژاردەی نیشتمانی عێراقن و زۆربەیان كوردن و خەڵكی پارێزگای هەولێرن، دكتۆر نەوزاد یەجیا باجگر سەرۆكی یانەی وەرزشیی زانكۆی جیهان لەگەڵ دكتۆر ئیسماعیل مولود جێگری سەرۆكی یەكێتی بەرزكردنەوەی قورسایی عێراق و دكتۆر قاسم هاشم سەرۆكی فیدڕاسیۆنی یەكێتی بەرزكردنەوەی قورسایی لقی هەولێر كۆبونەوە دوای خەڵات كردنی كچە پاڵەوانانی شاری هەولێر، یانەكە بڕیاریدا بە دابین كردنی پێداویستیەكانی تیپی بەرزكردنەوەی قورسایی یانەكە و دابین كردنی شوێنی پێویست بۆ مەشقەكانیان و دروست كردنی قوتابخانەیەكی پێگەیاندنی یاریزانان بۆ یانەكە و بۆ شاری هەولێر، لەم بارەشەوە دكتۆر ئیسماعیل مولود جێگری سەرۆكی یەكێتی بەرزكردنەوەی قورسایی عێراق بۆ گۆڤاری گوڵان گوتی" ئەم هەنگاوەی یانەی وەرزشیی زانكۆی جیهان بەرز دەنرخێنین و ئەوە گرنیگدانە بە یارییەكانی بەرزكردنەوەی قورسایی لە كوردستان و عێراق، وە لە ڕێگەی ئەم یارییە وەرزشییە دەتوانین ئەنجامی دڵخۆشكەر بۆ یانەكە و شاری هەولێریش بەدەست بهێنین و بتوانین كێبڕكێ لە سەر مەدالیاكانی دەرەوەی وڵاتیش بكەین.ئێمەش وەكو فیدڕاسیۆنی بەرز كردنەوەی قورسایی عێراق هاوكاری یانەكانی كوردستانیش دەبین بۆ خزمەت كردنی ئەم یارییە بتوانین ناوی هەولێر و كوردستانیش بەرز بكەینەوە.