ئەگەرچی زیانی كێشانی ڤەیپ Vaping یان جگەرەی ئەلیكترۆنی لە جگەرەكێشانی ئاسایی كەمترە، بەڵام هێشتا بێ زیان نییە. ڤەیپ بریتییە لە گەرمكردنی نیكۆتین لەگەڵ ماددەی دی بە مەبەستی چێژ و پەیداكردنی دوكەڵ بە شێوەی شلەی ڤەیپ e-liquid یان e-juice. نیكۆتین كە پێكهاتەی سەرەكییە لە جگەرە و ڤەیپدا، ماددەیەكی ژەهراوی و هاندەرێكی بەهێزە بۆ ڕاهاتن و دەبێتە هۆی بەرزبوونەوەی پەستانی خوێن و ئاستی هۆرمۆنی ئەدرینالین، كە تێكڕای لێدانەكانی دڵ زیاد دەكات هاوكات لەگەڵ زیادبوونی ئەگەری ڕوودانی نۆرەی دڵ. ماددەكانی دیكەی پێكهێنەری شلەی ڤەیپ هەرگیز بێ زیان نین و پەیوەندییان بە ڕەبوو و نەخۆشیی درێژخایەنی سییەكانەوە هەیە لەگەڵ نەخۆشییەكانی كۆئەندامی دڵ و سووڕان، لەگەڵ زیانی تەندروستی دیكەی وەكو: كۆكە، وشكبوونی دەم و قوڕگ، هەناسەتەنگی، هەروەها سەرئێشە.