كێشەی كارەبا لەڕووی كەمبوونەوەی ماوەكانی پێدانی كارەبا و گرفتەكانی نزمبوونەوەی ڤۆڵتییە و بارزۆری و پچڕانی كارەبا، بووە كێشەیەكی ئاڵۆز و بەردەوام، لەسەرجەم كابینەكانی حكومەتی هەرێمی كوردستاندا ئەم كێشەیە هەبووە. گرفتەكە لەوەدایە چەند وەزارەتی كارەبای حكومەتی هەرێمی كوردستان پڕۆژەی نوێ و تۆڕی كارەبای پاڵەپەستۆی نوێ جێبەجێ دەكات و بەرهەمهێنانی كارەبا زیاد دەكات، بەڵام لە بەرانمبەردا بڕە بوودجە و پارەیەكی زیاترمان پێویستە بۆ كڕینی زیاتری وزەی كارەبا و تێچوون و دابینكردنی سووتەمەنیی قورستر، ئەمەش بۆ جیاوازیی نێوان بەرهەمهێنان و دابینكردنی بوودجەیەكی زۆر بۆ بەدەستهێنانی كارەبا و هەڵكشانی خواست و زۆربوونی سەرفكردنی كارەبا دەگەڕێتەوە. بۆیە هەموو حكومەتەكانی جیهان لە هەوڵی ئەوەدابوون بابەتی تێچوون و هەڵكشانی خواست كۆنتڕۆڵ بكەن، بۆ ئەوەی دابینكردنی كارەبایەكی 24 كاتژمێری نەبێتە بارگرانیی زۆر گەورە لەسەر حكومەت. كەواتە كێشەكە لە خراپ بەكارهێنانی كارەبای نیشتمانی و زیادەمەسرەفی و زۆریی تێچوونی كڕینی وزەی كارەباكە و دابینكردنی سووتەمەنی بۆ ئەو بڕە بەرهەمهاتووەی كارەبا دەگەڕێتەوە، بەم شێوەیە بە هاوسەنگ كردنی بەرهەمهێنان و بەكارهێنانی كارەبا حكومەت دەتوانێت كارەبایەكی زیاتر و بەردەوام و بێ پچڕان بۆ هاووڵاتیان دابین بكات، لەولاشەوە بە هوشیارییەكی باشتر كارەباكە بەكار دەهێنرێت و بارگرانی لەسەر هاووڵاتیان و بوودجەی گشتی دروست نابێت.