ڕاپۆرتە پزیشكییە جیهانییەكانی ساڵی 2020 لە ئەنجامی 357 لێكۆڵینەوەدا جەختان كردووەتەوە كە نیوەی دانیشتووانی جیهان بەدەست جۆری جیاوازی سەرئێشەوە دەناڵێنن، هەروەها ئافرەتان زیاتر لە پیاوان تووشی سەرئێشە دەبن، بەم شێوەیە: 14% شەقەسەر، 26% گرژە سەرئێشە Tension headache، ڕیژەكانی دیكەش بە جۆری دیكەی سەرئێشەوە گرفتارن. سەرئێشە بریتییە لە هەستكردن بە ئازار لە ناوچەی سەر یان دەموچاودا، باوترین هۆكارەكانی سەرئێشە: هەڵامەت، ئەنفلوەنزا، بەرزبوونەوەی پلەی گەرمیی لەش(تا) لەبەر هەر هۆكارێك، گرژبوونی ماسوولكەكانی شان و مل، سترێس، گرفت لە بینیندا، ناڕێكیی كاتی ژەمەكانی خۆراك، كەم خەوتن و زیاد خەوتن، كەم خواردنەوەی ئاو و شلەمەنی، زیاد بەكارهێنانی دەرمانی دژەئازار، سووڕی مانگانەی ئافرەت، هەروەها وەستانی یەكجارەكی سووڕی مانگانە Menopause.