ئاژانسی دەنگوباسی ڕۆیتەرز لە هەواڵێكدا بڵاوی كردەوە كە بانکی ناوەندی ئەفغانستان کە ئێستا لەژێر کۆنتڕۆڵی تاڵیباندایە دەستی گرتووە بەسەر نزیکەی 12.4 ملیۆن دۆلار و ئاڵتونی بەرپرسانی پێشووی ئەفغانستاندا، لەو بەرپرسانەش جێگری سەرۆکی پێشووی ئەفغانستان ئەمروڵا ساڵحی تێدایە.

لەلای خۆشیەوە بانکی ناوەندی ئەفغانستان دووپاتی كردەوە كە  پارە و ئاڵتونەکان لە ماڵەکانی بەرپرسەکان هەڵگیراون، هەرچەندە هێشتا نەزانراوە بۆچی ئەو پارە و ئاڵتونانە لە ماڵەکانیاندا هەڵگیراون

هەر پەیوەست بەم هەواڵە لە بەیاننامەیەکی دیكەدا بانکی ناوەندی ئەفغانستان داوای لە هاووڵاتیانی ئەفغانی کرد دراوی وڵاتەکە بەکاربهێنن، ئەمەش لەکاتێکدایە نیگەرانییەکان لەسەر ئەوەی بانک و کۆمپانیاکانی وڵاتەکە پارەی کەمیان بەدەستەوە ماوە، بەتایبەتی دۆلار، کە بەشێوەیەکی بەرچاو بەکاردەهێندرێت، زیادییان کردووە..