چالاكوانێكی سلێمانی وەڵامی ئەندامێكی فراكسیۆنی گۆڕان لە پەرلەمانی كوردستان دەداتەوە و ئاشكرای دەكات كە تەنیا ئەو كەسانەی خۆفرۆشن لە نێو كورددا، گەندەڵی دەكەنە پاساو بۆ بێڕێزیكردن بە ئاڵای كوردستان.

عەلی حەمەساڵح، پەرلەمانتاری گۆڕان، لە یادی ڕۆژی ئاڵای كوردستان، نووسینێكی لە تۆڕە كۆمەڵایەتییەكان بڵاو كردۆتەوە و بە پاساوی دۆخی ئابووری و گەندەڵییەوە، دژایەتیی ئەو كەسانەی كردووە كە لە ڕوانگەی نیشتمانییەوە یادی ڕۆژی ئاڵایان كردۆتەوە.

لە بەرامبەردا ئاڕتین جەلال بەگ، چالاكوان لە سلێمانی، رایگەیاند: ”بەهۆی ئەو ڕقە مێژووییەی لە دژی كوردستان و ئاڵاكەی هەیە، نزیکەی شەست ساڵە دوژمنانی کورد لە ڕێی کۆمەڵێک بەکرێگیراو و مەقاشەوە، بەردەوام لە پیرۆزییە نەتەوەییەکانی کوردیان داوە، عەلی حەمە ساڵح و هاوئاوازانیشی لەو هاوکێشەیە بەدەر نین، هەرگیز چاوەڕوانی زیاتر و باشترمان لێیان نەبووە“.

ڕوونیشی كردەوە، خۆشویستن و ڕێزگرتن لە ئاڵای کوردستان، پەیوەندی بە گەندەڵی و خراپیی سیستەمی فەرمانڕەواییەوە نییە، ئەگەر پەیوەندی هەبوایە، ”دەبوایە زۆربەی خەڵكی وڵاتانی دونیا ڕێز لە ئاڵاكانیان و نیشتمانەکەیان نەگرن“. جەختیشی كردەوە: ”تەنیا کوردە خۆفرۆشەکانن گەندەڵییان كردووەتە بیانوو بۆ بێڕێزیكردن بە ئاڵا و نیشتمان“.

ئاڕتین جەلال بەگ دەڵێت: ”هەندێك پەرلەمانتار گەندەڵییان کردووەتە بیانوو بۆ دژایەتیی ئاڵای كوردستان، ئەگینا کێ گەندەڵی کردووە؟ مەگەر هەر خۆیان و حزب و سەرکردە و هاوڕێکانی خۆیان نەبوون؟ کێیە لە ناوجەرگەی سلێمانی ١٢٢ دۆنم موڵکی گشتی داگیر کردووە؟ کێیە لە خاڵە سنوورییەکان ٢٩ ساڵە خەریکی قاچاخچێتییە؟ زۆر نموونەی تریش“.

ئاماژەشی بەوە كرد: ”ئاڵا و هەموو ڕەمزە نەتەوەیی و نیشتمانییەکان شووناسی ئەو خەڵکەن کە کوردن، ڕێزگرتن و خۆشویستنیان هیچ پەیوەندییەکی بە شێوازی ئیدارەدان و حکومڕانی و بوونی گرفت و گەندەڵی و قەیرانەوە نییە. هیچ کەس لەبەر بوونی کێشە و کەموکوڕی ماڵەکەی خۆی ناسووتێنێ و نەفرەتی لێناکا، بەڵکو هەوڵی چاککردن و پاراستنی ئەدات“.












باسنیوز