رێکخراوی لانەی ژنان کە کار بۆ پەرەپێدانی ھۆشیاری ئافرەتان دەکات، لە کۆنفڕانسی ساڵانەی خۆیەدا ھەر جارەوە بابەتێکی پەیوەست بە ئافرەت و ئەرک و مافەکانی دەوروژێنێت و دەیخاتە روو، ئەویش بە مەبەستی دۆزینەوەی رێگە چارەی گونجاو و باشتر کردنی دۆخی خانمان، کۆنفڕانسی ئەمساڵیان تایبەت بوو بە کارکدنی ئافرەتان لە کەرتی تایبەت.
لەکۆنفڕانسەکەدا تیشک خرایە سەر گرنگی کارکردنی ئافرەت و بوونی داھاتی سەربەخۆ بە بەرھەڵستییەکی گەورەی توندەتیژی سەر ئافرەتان ھەژمار کرا، کۆنفڕانسەکە لە چوار پانێڵ پێکھاتبوو، کە لەلایەن د. ڤیان سلێمان سکرتێری یەکێتی ئافرەتانی کوردستان و تانیا جەمال بەرپرسی یەکسانی جەندەری لە وەزارەتی کار و لێلاڤ سەمیر بەڕێوەبەر لە کەرتی تایبەت و بازرگان لەگەڵ جوان رۆژبەیانی ئەندامی پەرلەمانی کوردستان بەڕَوەچوو.
لەلای خۆیەوە پارێزەر لانە ئامانج سەرۆکی رێکخراوی لانەی ژنان بۆ گوڵان گوتی:" بۆ کۆنفڕانسی ئەمساڵمان بە مەبەست ئەم بابەتەمان ھەڵبژارد، ئامانجمان لە خستنەرووی ئەم بابەتە ئەوەیە کە لەم بارودۆخە سەختە ئابوورییەی کە ئێستا ھەرێمی کوردستان پێیدا تێپەڕ دەبێت، دەکرێ خانمانیش لە مەیدانی کار و پەیدا کردنی بژێوی رۆژانە تواناکانیان بسەلمێنن، لەکاتێکدا مەبەستمان پەرەپێدانی ھۆشیاری کۆمەڵایەتی و خێزانی کۆمەڵگەکەمانە، ھەوڵبدەین لە کەرتی تایبەت ھەلی کار بۆ ئافرەتان بڕەخسێنین و ئافرەتان لە پاڵ پیاواندا ئەرکی دارایی خێزان ھەڵبگرن، ھەروەھا فشار لەسەر حکومەت و کەرتی گشتی نەمێنێت، وێڕای ھاندانی ئافرەتان و کارکردنیان لە کەرتی تایبەتدا، پێویستە ئەوە بڵێین کێشەی شیستیغلالکردنی خانمان لە میانەی کارکردنیان یەکێکە لە رێگرییەکانی کارکردنی ئافرەتان، ھیوادارین بگەینە قۆناغێک کێشەی توندوتیژی و چەوسانەوەی ئافرەتان لە کۆمەڵگەکەمان نەمێنێت، نەک ھەر ئەوەندە بەڵکو لە داھاتوودا ئافرەتان رۆڵێکی گرنگتریان لە کۆمەڵگەکەماندا ھەبێت".