پەرلەمانتارێک ئاشکرای کرد شاندی دانوستانکاری حکوومەتی هەرێمی کووردستان لە بەغدا لە درێژەی کۆبوونەوەکانیان ئەمڕۆ چوارشەممە سەردانی پەرلەمانی عێراق دەکەن.

مەیادە نەجاڕ، پەرلەمانتاری پارتی لە ئەنجوومەنی نوێنەرانی عێراق ڕاگەیاند: "لەسەر داوای محەمەد حەلبووسی، سەرۆکی پەرلەمانی عێراق ئەمڕۆ چوارشەممە ١٦ی١٢ی٢٠٢٠ شاندی دانوستانکاری حکوومەتی هەرێمی کوردستان سەردانی پەرلەمانی عێراق دەکەن".

ئاماژەی بەوەش دا: "لە هۆڵی دەستووری پەرلەمان شاندەکە لەگەڵ سەرۆکی فراکسیۆنەکان کۆ دەبنەوە و لەو کۆبوونەوەیەدا جگە لە سەرۆکی فراکسیۆنەکان، لیژنەی دارایی و یاساییش ئامادە دەبن و تێیدا باسی گفتوگۆکانی هەولێر و بەغدا دەکرێت و شاندەکە بە شەفافی هەموو شتێک باس دەکەن".

ئەو پەرلەمانتارە ئەوەشی خستە ڕوو: "شاندی دانوستانکاری حکوومەتی هەرێمی کوردستان لە گفتوگۆکانی لەگەڵ بەغدا پێشوەچوونی باشیان هەبووە و گفتوگۆ و کۆبوونەوەی گرنگیان کردووە و هەنگاوێکی باش لە گفتوگۆکانیان چوونەتە پێشەوە و لایەنی بەغدا ئامادەیی خۆیان پیشان داوە بۆ جێبەجێکردنی پابەندییەکانیان لە بەرامبەر پێدانی ماف و شایسته داراییەکانی خەڵکی هەرێمی کوردستان".

لە ڕۆژی چوارشەممەی ڕابردووەوە شاندی دانوستانکاری حکوومەتی هەرێمی کووردستان بۆ ڕێککەوتن لەسەر دۆسییەی نەوت و بودجە و مووچە و شایستە داراییەکانی هەرێمی کوردستان سەردانی بەغدایان کردووە و چەندین کۆبوونەوەی گرنگیان لەگەڵ بەرپرسانی حکوومەتی عێراق کردووە.





باسينيوز