پشتى كۆ ل ده‌مێن بۆریدا رێكه‌فتنا دناڤبه‌را هه‌رێما كوردستان و حكومه‌تا به‌غدا‌ ده‌ستپێكرى ژ بۆ ئارامكرنا ره‌وشا شنگالێ، ڤه‌گه‌ریانا خه‌لكێ وێ ده‌ڤه‌رێ و ده‌ركه‌فتنا هێزێن نه‌شه‌رعى ناڤا شنگالێ، لێ وه‌كه‌ به‌رپرسێ لقا 17 یا پارتى دیمۆكراتى كۆردستان ل قه‌زا شنگالێ دیار دكه‌ت كۆ چ رێكه‌فتن برێڤه‌ نه‌چوونه‌ و ئه‌و هێزێن نه‌شه‌رعى ژ شنگال نه‌ده‌ركه‌فتنه‌.

قادر قاچاخ، به‌رپرسێ لقا پارتى دیمۆكراتى كۆردستان ل قه‌زا شنگالێ دیار كر: "هه‌تا نۆكه‌ دلگرانى ڤه‌ چ گۆهرین ل رێكه‌فتنا شنگالێ نه‌ هاتنه‌ كرن و حكۆمه‌تا عیراقێ حه‌ز دكه‌ت هه‌ر شنگال یا داگیر كرى بیت ژلایێ هێزێن نه‌شه‌رعى ڤه‌ و ئه‌و چه‌نده‌ بۆ مه‌ره‌مێن وان یێن تایبه‌تن و ب پشته‌ڤانیا حكۆمه‌تا عیراقێ ڤه‌ ئه‌و هێزێن نه‌شه‌رعى هه‌تا ڤێ خۆله‌كێ ل ناڤا شنگالێ دا مانه‌ و هه‌تا نۆكه‌ ئه‌و هه‌موو هێزه‌ جهێ مه‌ترسیێ نه‌ بۆ سه‌ر ئاخ و خه‌لكێ شنگالێ".

به‌رپرسێ لقا پارتى دیمۆكراتى كۆردستان ل قه‌زا شنگالێ دیار ژى كر: "ئه‌وا نۆكه‌ دهێته‌ كرن كۆ حكۆمه‌تا عیراقێ دیار دكه‌ت كۆ هێزێن وان ناڤا شنگالێ دا هه‌نه‌ و ئارامى ل ده‌ڤه‌رێ به‌رپار كریه‌، بتنێ بۆ پركرنا چاڤێن راگه‌هاندنێ یه‌ و هه‌موو هێزێن نه‌شه‌رعى ل شنگالێ نه‌ ده‌ركه‌فتنه‌ و بتنێ بۆ ناڤ هاتیه‌ راگه‌هاندن و نها دا هێزێن نه‌شه‌رعى مینا په‌كه‌كێ و حه‌شدا شه‌عبى خۆ د ناڤا خه‌لكى و هێزێن عیراقێ دا ڤه‌شارتیه‌ و جلۆبه‌رگێن پۆلیسێن فیدرال د ڤه‌شارتى یه‌ و هند ژ وان ب جلۆبه‌رگێن مه‌ده‌نى هاتن و چوونێ دكه‌ن و دخازین حكۆمه‌تا ناڤه‌ندى ب دروستى و رژدى كار بكه‌ت تا كۆ به‌ندێن رێكه‌فتنا شنگالێ ب ساخ و زێندى بۆ خه‌لكێ شنگالێ بهێن دیاركرن چونكه‌ تا نها چ گۆهرین ل سه‌ر رێكه‌فتنا شنگالێ په‌یدا نه‌بوونه‌ و ب ڤى ره‌نگى مه‌ترسى ل سه‌ر ئاخ و خه‌لكێ شنگالێ به‌رده‌وامه‌ چونكه‌ تا نۆكه‌ هێزێن نه‌شه‌رعى ناڤا شنگالێ دا ژیانێ ده‌رباز دكه‌ن".












باسنیوز