گوتەبێژی بەڕێوەبەرایەتیی هاتووچۆی پارێزگای هەولێر رایگەیاند، لە رووداوێکی هاتووچۆدا دوو کەس گیانیان لەدەستدا.

فازڵ حاجی، گوتەبێژی بەڕێوەبەرایەتی هاتووچۆی پارێزگای هەولێر راگەیاند "رووداوەکە لەنێوان ئۆتۆمبێلێکی جۆری پیکاب و بارهەڵگرێکدا روویداوە، بەهۆیەوە شۆفێر و سەرنشینێکی پیکابەکە گیانیان لەدەستداوە".

گوتەبێژی هاتووچۆی هەولێر ئاماژەی بەوە کرد "شۆفێری پیکابەکە کۆنترۆڵی لەدەستداوە و چووەتە شەقامەکەی بەرامبەری و بەو هۆیەوە خۆی بە بارهەڵگرەکەدا کێشاوە. هەروەها تاکسییەکیش کە هاتووە و لە شوێنی رووداوەکە نزیکبووەتەوە وەرگەڕاوە، بەڵام جگە لە زیانی ماددی زیانی گیانیی بەدواوە نەبووە".

بە گوتەی گوتەبێژی هاتووچۆی هەولێر، رووداوەکە لەسەر رێگەی هەولێر - کەرکووک روویداوە و لێکۆڵینەوەش لە رووداوەکە دەستیپێکردووە.

فازل حاجی دەڵێت، لە سنووری هاتووچۆی هەولێر بەفر نەباریوە و بەهۆی بارینی بارانیشەوە هیچ کێشەیەکی هاتووچۆ دروستنەبووە، بەڵام رێنمایی شۆفێران دەکەین لەکاتی باران و گۆڕانی کەشوهەوا بە وریایی شۆفێری بکەن، تاوەکو لە رووداوی نەخوازراو بەدووربن.

rudaw -