هەفتەی داهاتوو لە کەرکووک دەرگای قوتابخانەكان بەڕووی قوتابیاندا دەكرێتەوە
لەمبارەوە شێرزاد رەشید كاکە، بەڕێوەبەری خوێندنی كوردی لە پەروەردەی كەركووك ڕایگەیاند: "كارگێڕیی هەموو قوتابخانەكانی خوێندنی كوردی و باخچەكانی منداڵان ئاگادار كراونەتەوە بڕیارە ڕۆژی یەكشەممەی هەفتەی داهاتوو ٢٩ی١١ی٢٠٢٠ دەست پێ بكاتەوە، هاوکات بڕیارە هەموو ڕێنماییەكانی وەک چۆنیەتیی دەوامكردنی قوتابیان و خوێندكاران و ژمارەی قوتابی و خوێندكار بۆ هەر پۆلێك و چۆنیەتیی ڕێكخستنی خشتەی وانەكانی هەفتە لە قوتابخانەكان و باخچەكانی منداڵان بڵاو بكرێـنەوە رێك بخرێن".
بەڕێوەبەری خوێندنی كوردی لە کەرکووک گوتیشی: "پێویسە هەموو دەستەی كارگێڕیی قوتابخانەكان و باخچەی ساوایان پابەندی ڕێنوێنییەكان بن و وەكوو خۆی جێبەجێیان بکەن بۆ ئەوەی بتوانین بە شێوەیەکی ڕێکوپێک و بە خۆپارێزییەوە ئەم ساڵی خوێندنە بەبێ دروستبوونی هیچ كێشەیەك بەڕێ بكەین".
شێرزاد رەشید كاکە گوتیشی: "بە هیوای ئەوەین كە ساڵێكی پڕ لە خێر و خۆشی و سەركەوتوو بێت بۆ ئەوەی پرۆسەی خوێندن بە زمانی كوردی و سەركەوتنی قوتابی و خوێندكارە خۆشەویستەكانمان بەردەوام بێت و هەروەك چۆن ساڵانی پێشوو لە سەر ئاستی عێراق لە ڕیزبەندی پێشەوەی خوێندندا بین".
باسنیوز
