گوتەبێژی وەزارەتی تەندروستیی حكوومەتی هەرێمی كوردستان ڕای گەیاند پێویستە دایك و باوكان منداڵەكانیان لە چۆنیەتیی خۆپاراستن لە تووشبوونیان بە پەتای كۆرۆنا ڕابێنن، چونکە منداڵانیش لە ماوەی 24 تا 48 كاتژمێردا تووشی ڤایرۆسەكە دەبن.

د. ئاسۆ حەوێزی، گوتەبێژی وەزارەتی تەندروستیی حكومەتی هەرێمی كوردستان ڕایگەیاند: "هەر لە سەرەتای بڵاوبوونەوەی پەتای كۆرۆناوە لەنێو منداڵانیشدا پەتاکە هەبووە، بەڵام بە ڕێژەیەكی كەمتر بووە، چونكە منداڵ تەنها هەڵگر و گوێزەرەوەی ڤایرۆسەكەیە".

گوتیشی: "منداڵان تەنیا بۆ ماوەی 24 تا 48 كاتژمێر تووشی نیشانەكانی ڤایرۆسەكە دەبن و ئێتر نیشانەكانیان تێدا نامێنێت،‌ چونكە منداڵان هەڵگرن و لەوانەیە كەسانی تر تووشی ڤایرۆسەكە بكەن".

د. ئاسۆ حەوێزی ڕوونیشی كردەوە: "ئەوانەی تووش بوون، تەمەنیان لە نێوان پێنج تا هەشت ساڵییە كە لە قۆناغەكانی خوێندنی یەك و دووی سەرەتایین و ڕێژەكە لە زیادبوونە و پشكنینی پۆزەتیڤمان هەبووە و هۆكارەكەشی ئەوە بوو كە دەرگای قوتابخانەكان كرابووە و منداڵان زیاتر پێکەوە تێكەڵ بوون".

گوتەبێژی وەزارەتی تەندروستی ئاگاداری دایك و باوكانی کردەوە و گوتی: "پێویستە دایك و باوكان زیاتر ئاگایان لە منداڵاڵەكانیان بێت، چونكە لەم تەمەنەدا خۆپارێزیی منداڵان زۆر زەحمەتە منداڵان كە لە قوتابخانە بوون و بەرپرسیارەتیان زیاتر بوو، بەڵام ئێستا لە ماڵەوەن و دەبێت دایك و باوكان ئاگاداریان بن و فێریان بكەن چۆن خۆیان دەپارێزن و ماسك بەكار بێنن و شتی تر نەخۆن، دوریان بخەنەوە لە قەرەباڵغی، پێویستە وەك كەسانی گەورە ڕایان بێنن كە خۆپارێزی بكەن".










باسنیوز