بەهۆی هەورەبرووسکەوە لە گەرمیان کەسێک گیانی لەدەستدا و وێستگەیەکی گەورەی کارەباش لە سلێمانی سووتا.

چەند رۆژێکە شەپۆلێکی بارانبارین رووی لە هەرێمی کوردستان کردووە و هەورەبرووسکەشی لەگەڵدایە.

لە چەند گەڕەکێکی سلێمانی بەهۆی زۆری و بەخووڕەمیی بارانەوە لافاو هەستا و ئاو چووە نێو ماڵی چەند هاونیشتمانییەکەوە.

هاونیشتمانییەکی دانیشتووی سلێمانی دەڵێت، "بەهۆی بارانبارینەوە لافاو هەستابوو و مەنهۆڵەکان هەموویان گیرابوون، چونکە قیریان بەسەردا کردوون و ئاو نەدەچووە ناویانەوە. ئیتر ئاو تا ماڵەکان هاتبوو."

هاوکات باران و هەورەبرووسكە وێستگەیەكی گەورەی كارەبای لە سلێمانی سووتاندووە و بەهۆیەوە بەشێكی ‏سلێمانی، هەڵەبجە، شارەزوو ‌و پێنجوێن بێ‌كارەبا بوون.

‏سیروان محەممەد، گوتەبێژی كارەبای سلێمانی ‏رایگەیاند، "كاژێر 01:05ـی خولەكی بەرەبەیانی رۆژی 2020/11/07 هەورەبرووسكە لە وێستگەیەكی گەورەی گواستنەوەی كارەبای ‏سلێمانیی داوە. بەو هۆیەشەوە وێستگەكە سووتاوە."

گوتەبێژی كارەبای سلێمانی باسی لەوەش كرد، تیمەكانی چاكسازیی ‏وێستگەكان و هێڵەكانی بەڕێوەبەرایەتییەكە سەرقاڵی چارەسەركردنی ‏كێشەكەن.‏

هاوکات بەهۆی هەورەبرووسکەوە لە گوندی سۆفی رەحیمی گەرمیان شوانێکی 26 ساڵ گیانی لەدەستدا.

بەرهەم حەسەن ئەحمەد لەدایکبووی 1994ە، بەرەبەیانی رۆژی شەممە بەهۆی بەرکەوتنی هەورەبرووسکەوە بریندار بوو و دوای گەیاندنی بە بەشی فریاکەوتنی نەخۆشخانەی شەهید هەژار لە کەلار، بەهۆی کاریگەریی هەورەبرووسکەکەوە گیانی لەدەستدا.

محەممەد کەمال، شارەزای کەشناسی لە بەڕێوەبەرایەتیی کەشناسی و بوومەلەرزەزانیی گەرمیان بە راگەیاند، "پێشتر هۆشدارییان داوە کە بەهۆی ناسەقامگیریی کەشوهەوا و ئەگەری هەورەبرووسکەوە هاونیشتمانییان لە ماڵەکانیاندا بمێننەوە."
rudaw -