کارگەکانی بەرهەمهێنانی چپسی پەتاتە لە هەرێمی کوردستان گرێبەست لەگەڵ جووتیارانی بەرهەمهێنی پەتاتە دەکەن بۆ کڕینەوەی بەرهەمەکانیان; گرێبەستەکەش لەژێر چاودێریی وەزارەتی کشتوکاڵ و سەرچاوەکانی ئاو دەبێت.

ئەمڕۆ دووشەممە 26ی تشرینی یەکەمی 2020، بێگەرد تاڵەبانی، وەزیری کشتوکاڵ و سەرچاوەکانی ئاوی هەرێمی کوردستان سەرپەرشتیی کۆبوونەوەی کارگەکانی چپسی پەتاتە و جووتیارانی کرد.

بەپێی راگەیێندراوی وەزارەتی کشتوکاڵ، لە كۆبوونەوەكەدا کە كەریم سلێمان، بریكاری وەزارەت ئامادەی بووە و گفتوگۆ لەبارەی هاوردەكردنی جۆرەكانی بنەتۆی پەتاتە کراوە بۆئەوەی جووتیاران بیچێنن و كارگەكانیش لێیان بكڕنەوە.

هەروەها گرێبەستێكی یاسایی لەنێوان كارگەكان و جووتیارانی بەرهەمهێنی پەتاتە دەكرێت "بۆئەوەی كارگەكان بەرهەمی جووتیاران بكڕنەوە، وەزارەتی كشتوكاڵ و سەرچاوەكانی ئاویش سەرپەرشتیی گرێبەستەكە دەكات بۆئەوەی هەردوولا پابەندبن بە گرێبەستەكەوە".

لە بەشێكی دیکەی كۆبوونەوەكە گفتوگۆ كراوە لەبارەی كاتی دانانی باجی گومرگی لەسەر هاوردەكردنی پەتاتە، وەزارەتی کشتوکاڵ دەڵێت "جووتیاران كات و بڕی باجەکەیان بەلاوە پەسند بوو".

هەر لەو کۆبوونەوەیەدا بڕیادراوە هاوئاهەنگییەکان بەردەوامبن بۆ ساخكردنەوەی بەرهەمی ناوخۆیی، ئەوەش لەڕێگەی بەدواداچوون و گرتنەبەری چەند هەنگاوێكی پێویست.

هەر لە كۆبوونەوەكەدا بڕیاردراوە بە كردنەوەی خولی راهێنان بۆ جووتیارانی پەتاتە، تایبەت بە پێدانی زانیاری لەبارەی دوایین هەنگاو و گۆڕانکارییەکان لە بەرهەمهێنانی پەتاتە.
rudaw -