بەڕێوەبەرى گشتیى وەبەرهێنانى هەولێر رای گەیاند بەمنزیکانە دەست بە بنیادنانى گەورەترین ناوچەى پیشەسازى لەسەر ئاستى عێراق لە هەولێر دەکرێت، کە چەندین کۆمپانیاى کشتوکاڵى و پیشەسازى لەخۆ دەگرێت.

سامان عەرەب، بەڕێوەبەرى گشتیی وەبەرهێنانى هەولێر راگەیاند: "بڕیارە لە کۆتایى ئەم مانگەدا دەست بە بنیادنانى ناوچەیەکی گەورەی پیشەسازى لە هەولێر بکرێت، کە بە گەورەترین ناوچەى پیشەسازى لەسەر ئاستى عێراق هەژمار دەکرێت و لەسەر ڕووبەرى 4500 دۆنم جێبەجێ دەکرێت، لەسەر رێگەى سەرەکیى هەولێر- گوێڕ لە ناوچەیەکى بەرفراوان و ستراتیژیى گرنگ هەڵکەوتووە".

راشی گەیاند: "ناوچەى پیشەسازیى هەولێر لە ساڵى 2012وە بەردى بناغەى داندراوە، بەڵام بەهۆى قەیرانى داراییەوە نەتواندراوە تەواو بکرێت، لە کابینەى نۆیەمدا بڕیار لەسەر جێبەجێکردنى پڕۆژەکە دراوە، بۆ ئەم مبەستەش تەواوى وەزارەت و بەڕێوەبەرایەتییەکان هاوکار دەبن بۆ ئەوەى پڕۆژەکانى ئاو و ئاوەڕۆ و کارەبا و رێگەوبان و سەزایى بۆ پڕۆژەکە دابین بکرێت".

بەڕێوەبەرى گشتیی وەبەرهێنانى هەولێر ئاماژەى بەوەش کرد: "ناوچەى پیشەسازیى هەولێر کە بە تیمار ناسراوە، چەندین کۆمپانیا و کارگەى گەورە لە بوارەکانى کشتوکاڵ و پیشەسازى و پیشەسازیى گەورو لەخۆ دەگرێت، کە دەبێتە هۆى بووژاندنەوەى کەرتى ئابوورى و سەرچاوەى داهات و بژیوى هەزاران خێزان لە هەولێر و دەوروبەرى".






باسنیوز