پشتى كو بۆ ده‌ما چه‌ندین رۆژانه‌، ژ پێخه‌مه‌ت پاراستنا گیانێ خه‌لكێ هه‌رێما كوردستانێ، ژلایێ وه‌زاره‌تا ناڤخو یا حكومه‌تا هه‌رێمێ بریارا قه‌ده‌غه‌یا هاتن و چوونێ ل سه‌رانسه‌رى هه‌رێما كوردستانێ هاتبو دان، ل سنورێ پارێزگه‌ها دهۆكێ هژماره‌كا زۆر یا جۆتیاران گله‌ و گازنده‌یێن خو دگه‌هاندنه‌ قایمقامیا دهۆكێ كو ژ ئه‌گه‌رێ ئه‌ڤێ بریارێ ئه‌و ژ كه‌زاختن و كولانا زه‌ڤیێن خو بێ به‌هر بوونه‌ و قایمقامیا دهۆكێ ژى مزگینیێ دده‌ته‌ جۆتیاران دێ شێن ڤه‌گه‌رنه‌ سه‌ر كارێ خو.

جه‌هوه‌ر عه‌لى، قایمقامێ قه‌زا دهۆكێ د داخویانیه‌كێ دا دیاركرن: "راسته‌ ئه‌م دزانین كو قه‌ده‌غه‌یا هاتن و چوونێ بوو ئه‌گه‌ر هژماره‌كا زۆر یا جۆتیارێن سنورێ پارێزگه‌ها دهۆكێ نه‌شێن ژ مالێن خو ب ده‌ركه‌ڤن و ده‌ست ژ كولان و كه‌زاختن و كاروبارێن باغ و بیستان و زه‌ڤیێن خۆ به‌ردا ینه‌، لێ چ گومان تێدا نینه‌ ئه‌ڤ بریاره‌ ژ پێخه‌مه‌ت پاراستنا گیانێ خه‌لكێ مه‌ هاتینه‌ دان، دانا ئه‌ڤان بریاران رامان ئه‌و چه‌نده‌ یه‌ كو گیانێ خه‌لكێ، بۆ حكومه‌تا هه‌رێمێ گرنگتره‌ ژ هه‌ر تشتى".

قایمقامێ قه‌زا دهۆكێ ئه‌و چه‌نده‌ ژى دا دیاركرن: "رۆژانه‌ هژماره‌كا زۆر یا جۆتیارێن دهۆكێ قه‌ستا قایمقامیا دهۆكێ دكه‌ن، ژ بۆ وێ چه‌ندێ ئه‌م وه‌كه‌ قایمقامى رێكێ بده‌ینه‌ وان تا كو قه‌ستا ناڤ باغ و بیستانێن خو بكه‌ن، لێ ژ به‌ركو ئه‌م ژى ب هه‌مو ره‌نگه‌كێ پابه‌ندى بریارێن وه‌زاره‌تا ناڤخو یا حكومه‌تا هه‌رێمێ نه‌ و ل دیڤ بریارێن حكومه‌تێ دێ سه‌ره‌ده‌رى دگه‌ل خه‌لكێ و جۆتیاران هێته‌ كرن".

ناڤبرى ئاماژه‌ ب وێ چه‌ندێ ژى دا: "مزگینیێ دده‌ینه‌ هه‌مو جۆتیاران كو ل دیڤ بریاره‌كا وه‌زاره‌تا ناڤخو یا حكومه‌تا هه‌رێمێ دێ رێك ب جۆتیاران هێته‌ دان، تا كو قه‌ستا ناڤ باغ و بیستان و ئاقارێن خۆ بكه‌ن، لێ بو ئه‌ڤێ چه‌ندێ ژى مه‌ ژى چه‌ند رێنمایه‌ك هه‌نه‌ و دڤێت ئه‌و جۆتیارێ ئه‌ڤى كارى رادبیت قه‌ستا مه‌ بكه‌ت، تا كو هه‌مو پێرابون و پێزانینان وه‌ربگریت و ئێك ژ وان پێرابونان دڤێت جۆتیار ل سپێده‌هیه‌كا زوو ژ مال ب ده‌ركه‌ڤیت و ئێڤاریه‌كا دره‌نگ ب ڤه‌گه‌ریته‌ ناڤا مالا خۆ دا، هه‌ر جۆتیاره‌كێ حه‌ز بكه‌ت ب ڤه‌گه‌ریته‌ سه‌ر كارێ خو دڤێت ژلایێ مه‌ ڤه‌ هند پێزانینان وه‌ربگریت، پاشان ده‌ست ب كارێ خو یێ جۆتیاریێ بكه‌ته‌ ڤه‌".













باسنیوز