پشتى كو ژلایێ لێژنه‌كا تایبه‌ت یا قایمقامیا قه‌زا دهۆكێ دیڤچوون بۆ سەنتەرەكا جوانكاریێ ھاتیە كرن كو خودانا جوانكاریێ، پشتى جهێ وێ یێ كارى هاتیه‌ دائێخستن، رابوویه‌ ل ناڤا مالا خۆ بیك خه‌ملاندین، لێژنا ناڤبرى نه‌چار بوو وێ سزا بده‌ت.

جه‌وه‌ر عه‌لى، قایمقامێ قه‌زا دهۆكێ د داخویانیه‌كێ دا دوپاتكر: "به‌ریا چه‌ندین رۆژان د چارچۆڤا‌ بریارێن حكومه‌تا هه‌رێما كوردستانێ ژ پێخه‌مه‌ت پاراستنا گیانێ خه‌لكێ ژ نه‌خۆشیا ڤایر‌وسێ كۆرونایێ دا هژماره‌كا زۆر یا جهان هاتینه‌ گرتن و ژ وان جهان ژى سەنتەرێن جوانكاریی و خه‌ملاندنا بیكان بوینه‌ لێ خودانه‌كا سەنتەرەكا جوانكاریێ ل دهۆكێ ل ناڤا مالا خۆ بیك خه‌ملاندینه‌ و پشتى پێزانین گه‌هشتینه‌ مه‌، لێژنا دیڤچوونێ بله‌ز گه‌هشتنه‌ مالا وێ و كاودان ب ئێكسه‌ر دیتنه‌".

قایمقامێ قه‌زا دهۆكێ ئه‌و چه‌نده‌ ژى دوپاتكر: "خودانا وێ سەنتەرا جوانكاریێ ل دهۆكێ ل ناڤا مالا خۆ دا كو شوقه‌یه‌كا ئاكنجیبوونێ بوویه‌، بیك خه‌ملاندینه‌ و ده‌ما لێژنا مه‌ گه‌هشتیه‌ مالا وێ، ئه‌و مژوولى خه‌ملاندنا بیكه‌كێ بوو، له‌ورا مه‌ ب فه‌ر دیت ئه‌وێ سەنتەرا جوانكاریێ سزا بده‌ین و دێ هه‌مو پێرابوونێن یاسایى دگه‌ل خودانا وێ سەنتەرێ هێنه‌ ئه‌نجام دان له‌ورا خه‌لكێ خۆ پشت راست دكه‌ین دیڤچوونا مه‌ بۆ هه‌مو جهان دێ به‌رده‌وام بیت و هه‌ر جهه‌ك پێگیر نه‌بیت ب رێنمایان دێ ب توندى هێته‌ سزادان".











باسنيوز