بەڕێوەبەرایەتیی گشتیی رۆشنبیری و هونەری گەرمیان لەبارەی شانۆگەریی "وەرن ببین بەسەگ" لە فەرمانێکی کارگێڕیدا ئاماژە بەوە دەکات، دوابەدوای بەدواداچوونیان بۆ ئەو شانۆگەرییە بڕیاردراوە، "گرووپی هونەریی ئەستێرەکان" بۆ ماوەی ساڵێک لە سەرجەم کار و چالاکییەکانی بەڕێوەبەرایەتییەکەیان سڕبکەن.

هەروەها لە فەرمانە کارگێڕییەکەدا ئەوە خراوەتەڕوو، هەر گرووپ یان کەسێک لە سنووری دەسەڵاتیاندا سووکایەتی بەرامبەر پیرۆزییەکانی هاونیشتمانییان بکات، هەمان رێکاری لەگەڵدا دەگیرێتەبەر و لە ئەگەری دووبارەبوونەوەیدا رێکارەکان تووندتر دەبن.

رۆژانی 22 و 23-02-2020 لە کار و چالاکییەکانی "وەرزی شانۆ لە گەرمیان" بەڕێوەچوون و تێیاندا شانۆگەرییەک بە ناوی "وەرن ببین بە سەگ" نمایشکرا کە هاوکات کاردانەوەی لێکەوتەوە.

یەکێتیی زانایانی ئایینی ئیسلامی کوردستان لە داواکارینامەیەکدا بۆ وەزارەتی رۆشنبیری و لاوانی حکومەتی هەرێمی کوردستان داوادەکات، لێپێچینەوە لەبارەی ئەو شانۆگەرییەوە بکرێت کە لە گەرمیان پێشکەشکرا و ئاماژە بەوە دەکات، "تێیدا سووکایەتی بە ئایینی ئیسلام کراوە و سووکایەتیکردن بە ئیسلام و پەیڕەوانی هەر ئایینێکی دیکە رێگەپێدراو نییە".

یەکێتیی زانایانی ئایینی ئیسلام ئاماژە بەوە دەکات، لەو شانۆگەرییەدا "زۆرترین سووکایەتی و قسەی بێڕێزی بەرامبەر بە مینبەر و مزگەوت و مامۆستایانی ئایینی و ئەحکامە شەرعییەکانی ئیسلام کرا".

لە داواکارینامەکەدا هاتووە، "بە تووندی ئیدانەی ئەو سووکایەتییانە دەکەین، چونکە سووکایەتی بە ئیسلام و هەر ئایینێکی دیکەی ئاسمانی رێگەپێدراو نییە".

یەکێتیی زانایان باس لەوە دەکات، "ئەم جۆرە هەنگاوانە هیچ جۆرە خزمەتێک پێشکەشناکەن و مەترسیی زۆریشی بۆ سەر ئاسایشی کۆمەڵایەتی و پێکەوەژیان هەیە".

یەکێتیی زانایانی ئایینی ئیسلامی کوردستان داوا دەکات، لێپێچینەوەی پێویست لەو بارەیەوە بکرێت و رێگری لەو جۆرە کارانە بکرێت کە پێچەوانەی شەریعەت، یاسا، بەها و نەریتی رەسەن و هەستی ئایینداریی هاونیشتمانییانی کوردستانن.