ئەمڕۆ یەكشەممە سەرۆك مەسعود بارزانی لە سەڵاحەدین، پێشوازی لە شاندێكی كۆنگرێسی ئەمەریكا كرد كە پێكهاتبوون لە سێناتۆر جێمس ئێنهۆف بەرپرسی لیژنەی هێزە چەكدارەكانی ئەمریكا و سێناتۆر جۆن بووزمەن و سێناتۆر ماریۆن مایكڵ ڕۆندز و سێناتۆر كێڤین كرامێر، لەگەڵ هەردوو ترێنت كێڵی و تیمۆسی واڵبێڕگ ئەندامانی ئەنجوومەنی نوێنەرانی ئەمەریكا.

لەم دیدارەدا كە ماسیو تیولەر باڵوێزی ئەمەریكا لە عێراق ئامادەی بوو، بارودۆخی سیاسی و دواپێشهاتەكانی عێراق و ناوچەكە تاوتوێ كرا، شاندی میوان ئامانجی سەردانەكەیان بۆ عێراق و هەرێمی كوردستان خستەڕوو و جەختیان لە دۆستایەتی و پەرەپێدانی پەیوەندیی نێوان گەلی ئەمەریكا و گەلی كوردستان كردەوە.

هەر لەو دیدارەدا سەرۆك بارزانی سوپاسی گەل و حكوومەت و سوپای ئەمەریكای كرد كە لە شەڕی دژی تیرۆریستانی داعشدا پشتیوانی گەلی كوردستان بوونە و پێزانینی هەبوو بۆ دۆستایەتیی نێوان هەردوو گەلی كوردستان و گەلی ئەمەریكا، ڕاشیگەیاند شەڕی دژی تیرۆر لوتكەی هاوكاری و دۆستایەتیی نێوان هەرێمی كوردستان و ئەمەریكا بوو.

لە بەشێكی تری ئەو دانیشتنەدا بیروڕا لەبارەی ڕێگەكانی گێڕانەوەی سەقامگیری بۆ عێراق و هەڕەشەكانی تیرۆر لەسەر ئاسایشی جیهانی ئالوگۆڕ كرا.










باسنيوز