بەڕێوەبەرایەتیی پۆلیسی ھەولێر لە ڕاگەیاندراوێکی فەرمیدا ئاشکرای کرد، کە دوو کەس لە ھەولێر بەھۆی دزییەوە دەستگیر کراون.

ئەمڕۆ پێنجشەممە 25/4/2019، بەڕێوەبەرایەتیی پۆلیسی ھەولێر، ڕاگەیاندراوێکی لە پەیجی فەرمیی خۆی، لە تۆڕی کۆمەڵایەتیی (فەیسبووک) بڵاو کردەوە، تێیدا ڕائید باساک فەرەج ڕەحیم، ئەفسەری نووسینگەی نەھێشتنی تاوانی عەنکاوە ڕای گەیاندووە: "ئاگادار کراینەوە بەبوونی ڕووداوێکی دزی لە یەکێک لە کۆگاکان لە ڕێگای نێوان ھەولێر - گەزنە، ئێمەش گەیشتینە شوێنی ڕووداوەکە و دەستمان بە لێکۆڵینەوەیەکی ورد کرد".

باسی لەوەش کردووە: "دوای کۆکردنەوەی زانیاری لەبارەی ئەم ڕووداوەوە، توانیمان بە ناسنامەی دوو تۆمەتبار بگەین و لە بۆسەیەکدا دەستگیریان بکەین، تۆمەتباران بەناوی (ع، ع، ع) تەمەن 38 ساڵ و (ا، ب، م) تەمەن 28 ساڵ، تۆمەتباران دوای دەستگیر کردنیان دانیان بەتاوانەکەیاندا ناوە، کە ئامێرێکی باڵۆنپرێس و دوو مشار و دوو PVCیان دزی بوو، کە بڕەکانیان بە نزیکەی 35 ھەزار دۆلاری ئەمریکی دەخەمڵێنرێت".

پۆلیسی ھەولێر لە ڕاگەیاندراوەکەدا ئاماژەی بەوەش داوە، کە پەڕاوی لێکۆڵینەوە بۆ تۆمەتباران ڕێک خرا و ڕەوانەی بەردەم دادوەر کراوە، دادوەریش بڕیاری دا بە بەندکردنی ھەردوو تۆمەتبار بەپێی ماددە 44 لە یاسای سزادانی عێراقی.









باسنيوز