ڕاوێژکارێکی مەکتەبی سیاسیی پارتی دیموکراتی کوردستان ڕای گەیاند، بزووتنەوەی گۆڕان لە ناوەڕۆکی گفتوگۆکانی نێوان پارتی و یەکێتیی نیشتمانیی کوردستان ئاگادارە و ”تائێستا هەڵوێستێکی جوانیان هەیە“.

عارف ڕوشدی، ڕاوێژکاری مەکتەبی سیاسیی پارتی ڕايگەیاند: ”ئەو گفتوگۆیەی لەگەڵ یەکێتی دەکرێت، گۆڕان لە ناوەڕۆکی ئاگادارە، پارتیش ھەموو ھەوڵێکی خستۆتە گەڕ بۆ ئەوەی لەگەڵ ھەردوو لایەنەکە ھەماھەنگی دروست بکات و پێکەوە کۆتایی بە ڕێککەوتنەکە بێنن“.

ئەو ڕاوێژکارەی مەکتەبی سیاسیی پارتی ئاماژەشی بەوە کرد، ”برادەرانی گۆڕان تا ئێستا ھەڵوێستێکی جوانیان ھەیە، ئامادەباشییان ھەیە بۆ ئەوەی پێکەوە لەگەڵ یەکێتی و پارتی کار بکەن و حکوومەت بکەوێتە سەر کاری خۆی“.

عارف ڕوشدی نەیشاردەوە کە ”ھەموو ھەوڵێک“یان بۆ ئەوەیە، بە زوویی ڕێککەوتنەکەی نێوان پارتی و یەکێتی واژۆ بکرێت، چەندە ”بەرامبەر ئەو ئەرکە گەورەیە، کات نە بە کاتژمێر و نە بە ڕۆژ ناپێورێت، ھەرکاتێک پێویست بوو، ئامادەین ئەو ئەرکە جێبەجێ بکەین“.











باسنيوز