محەممەد باقر نەوبەخت، بەرێوەبەری گشتیی مانگی سووری سنە بۆ دۆزینەوەی منداڵە ونبووەکانی هەڵەبجە داوایەك ئاراستەی خێزانەکانیان دەکات و دەڵێت: "دەتوانن بۆ بەدواداچوون و دۆزینەوەی منداڵە ونبوەکانتان، پەیوەندی بە مانگی سووری سنەوە بکەن".

نەوبەخت ده‌شڵێت: "لەکاتی کیمیابارانەکەی هه‌ڵه‌بجه‌دا، رێژەیەکی زۆر لە بریندارەکانیان هێنایه‌ خەستەخانەکانی ئێران، بەداخەوە ئەو هەلومەرجی تایبەتە بوو بە هۆی ئەوەی بەشێك لە خێزانەکان منداڵەکانیان ون بن و تا ئێستا ئاگایان لە چارەنووسیان نەبێت. بەپێی ئەو پەیوەندییانەی کە لەگەڵ شارە کوردییەکانی عێراقدا هەمانە، دەتوانن زانیاریی پێویست لە بارەی منداڵە ونبووەکانیان بدەنە مانگی سووری شارەکانی سنە، سەقز، بانە و مەریوان، تا ئێمەش بتوانین لە رێگەی گرووپە پسپۆرەکانی خۆمانەوە ئەو منداڵانەیو کە تا ئێستا چارەنووسیان نادیارە و لە ئێران ماون، بیاندۆزینەوە و بیانگەڕێنینەوە بۆ ئامێزی گەرمی بنەماڵەکانیان".

دوای كیمیابارانكردنی هه‌ڵه‌بجه‌ له‌لایه‌ن ڕژێمی به‌عس له‌ 16ی ئادار/ مارسی 1988، وێڕای شه‌هیدبوونی زیاتر له‌ 5 هه‌زار هاووڵاتیی بێتاوان، ژماره‌یه‌كی یه‌كجار زۆری منداڵیش بێسه‌روشوێن بوون و تا ئێستا نه‌دۆزراونه‌ته‌وه‌.


k24-