شێخێکی عەشیرەتە عەرەبییەکانی عێراق لەبارەی کوردەوە هۆشداریی دەدات.



شێخ موزاحیم ئەلحوێت، گوتەبێژی عەشیرەتە عەرەبییەکانی دەشتی نەینەوا راگەیاند، راکان جبووریی پارێزگاری سەپێندراوی حەشدی شەعبی بەسەر کەرکووک دەستی بە پرۆسەی بەعەرەبکردن و دەرکردنی کورد کردووە.



شێخ موزاحیم ئەلحوێت هەروەها رایگەیاند، فەرماندەیی ئۆپراسیۆنەکانی کەرکووک، میلیشیاکانی حەشدی شەعبی و ئەنجومەنی عەرەبی لە کەرکووک پاڵپشتیی راکان جبووری دەکەن بۆ بە عەرەبکردنەوەی کەرکووک و درکردنی هاووڵاتییانی کورد لێی.



گوتەبێژی عەشیرەتە عەرەبییەکانی دەشتی نەینەوا بە ئاماژەکردن بەوەی ئەو هەوڵەی راکان جبووری و میلیشیاکان هاوشێوەی کردە تیرۆریستییەکانی رێکخراوی تیرۆریستی داعشە، هۆشداریی داوە لەوەی ئەگەر ئەو پرۆسەیە بەردەوام بێ، ئەوا ئاژاوەی تائیفی و نەتەوەیی دروست دەبێت و تەڕ و وشک بەیەکەوە دەسووتێنێت و عەرەبە مەدەنی و بێگوناهەکانیش باجەکەی دەەن.



دوای خیانەتی 16ـی ئۆکتۆبەری 2017، حەشدی شەعبی کەرکووکی داگیرکرد و راکان جبووری وەک پارێزگاری شارەکە دیاری کرد.



جبووری جگە لە دەرکردنی سەدان کورد لە کارەکانیان، دەستی بە پرۆسەی بە عەرەبکردنەوەی کەرکووک کردووە.