بەرپرسێکی پارتی ڕای دەگەیەنێت، وەزارەتی بەرگریی عێراق لیوایەکی دیکەی سەربازیی ڕەوانەی سەنتەری شاری خانەقین دەکات و بڕیارە لە بارەگای لقی ١٥ی پارتی کە داگیر کراوە، جێگیر بکرێن.

شێخ جەعفەر مستەفا، بەرپرسی لقی ١٥ی پارتی ڕايگەیاند: "بڕیارە ٢\٤\٢٠١٩ وەزارەتی بەرگریی عێراق لیوایەکی دیکەی سەربازی ڕەوانەی سەنتەری شاری خانەقین بکات، پێشوەختەش ڕێککەوتنێک لە نێوان ئەو لیوایە و حەشدی شەعبیدا کراوە، بۆ ئەوەی حەشد بارەگای لقی ١٥یان بۆ چۆڵ بکات و ئەوان بێنە ناو لقەوە".

بەرپرسەکەی پارتی ئاشکراشی کرد: ”هاتنی ئەو لیوایە جارێکی دیکە بشێوی دروست دەکات، جیا لەوەش هاتنی ئەو هێزە کارێکی باش نییە".

ئەوەشی خستە ڕوو: "پێشتر لێژنەیەکی هاوبەش لە نێوان وەزارەتی پێشمەرگە و وەزارەتی بەرگریی عێراق دروست کراوە، لێژنەکەش ڕاپۆرتی خۆی ئامادە کردووە و ناوچەکانیان دیاری کردووە، بۆ ئەوەی هێزی هاوبەشیان تێدا دابنرێت، کەچی لەملاوە هێزی سەربازی دەنێردرێتەوە، خەڵکی ئێمە داوای گەڕاندنەوەی هێزی پێشمەرگە دەکەن".

ڕوونیشی کردەوە ئێستا هێزەکانی "حەشدی شەعبی، بەدر، سەدر و پۆلیسی فیدراڵی" لەناو خانەقیندا بارەگایان هەیە".











باسنيوز