وەزیری شارەوانی و گەشتوگوزاری حکوومەتی هەرێمی کوردستان، ڕایگەیاند کە هەرێم و بەغدا لە گفتوگۆدا دەبن بۆئەوەی کار لەسەر دانەوەی مووچەی پاشەکەوتکراوی فەرمانبەرانی ھەرێم بکەن.

نەورۆز مەولود، وەزیری شارەوانی و گەشتوگوزار ڕايگەیاند، "دوای ئەوەی نێچیرڤان بارزانی، سەرۆکی حکوومەتی ھەرێمی کوردستان، سیستەمی پاشەکەوتکردنی مووچەی فەرمانبەرانی ھەڵوەشاندەوە، چیتر فەرمانبەران پاشکەوتی مووچەیان لەسەر نامێنێت و مووچەکانیان وەکو خۆی بەبێ پاشکەوت وەردەگرن".

گوتیشی: "لەکۆبوونەوەکەی دوێنێی ئەنجومەنی وەزیران نێچیرڤان بارزانی، بەئامادەبوونی سەرجەم وەزیرەکان جەختی لەوە کردەوە، ئەو پارەیەی فەرمانبەران کە حکوومەتی ھەرێم بەھۆی قەیرانی داراییەوە پاشەکەوتی کردووە، سەرجەم پارە پاشەکەوتەکە دەدرێتەوە بە فەرمانبەران و مووچە خۆران".

وەزیری شارەوانی ئاماژەی بەوەشدا، پارەی پاشکەوتی فەرمانبەران نافەوتێ و ئەو پارەیە دەدرێتەوە بەفەرمانبەران بێگومان ھەرێم و بەغدا لە گفتوگۆ دادەبن بۆئەوەی کارلەسەر دانەوەی پارەی پاشەکەوتی فەرمانبەرانی ھەرێم بکەن.

رۆژی هەینی 8/3/2019، نێچیرڤان بارزانی، سەرۆکی حکوومەتی هەرێمی کوردستان، بڕیاری هەڵوەشانەوەی سیستەمی پاشەکەوتی مووچەی ڕاگەیاند و جەختی لەوە کردەوە كە لەم مانگەوە بێ پاشەکەوت، مووچەی فەرمانبەران دابەش دەکرێت.










باسنيوز