بەڕێوەبەرایەتیی پۆلیسی سلێمانی لە ڕاگەیاندراوێکدا ئاشکرای کرد، بەھۆی ڕووداوێکی ھاتوچۆ چوار کەس بوونە قوربانی.

ئەمڕۆ یەکشەممە 24/2/2019، بەڕێوەبەرایەتیی پۆلیسی سلێمانی ڕاگەیاندراوێکی لە پەیجی فەرمیی خۆی، لە تۆڕی کۆمەڵایەتیی (فەیسبووک) بڵاو کردەوە، تێیدا ھاتووە: "پێشنیوەڕۆی ئەمڕۆ لەئەنجامی ڕووداوێکی ھاتوچۆ لەسەر ڕێگای خەلەکان – ڕانیە، نزیک گوندی (باقلان)، کەسێک گیانی لەدەست دا و سێ کەسی دیکەش بریندار بوون".

باس لەوەش کراوە: "ڕووداوەکە لەنێوان دوو ئۆتۆمبێلدا لە جۆرەکانی ھیۆندای ئێلێنترا و تۆیۆتا ھایلۆکس ڕووی داوە، لەئەنجامدا شۆفێری ھیۆندایەکە گیانی لەدەست داوە و سێ لە سەرنشینەکانی تۆیۆتاکەش بریندار بوونە".

پۆلیسی سلێمانی ئاماژە بەوەش دەدات، کە پاش گەیشتنی ھێزەکانی بەشی پۆلیسی دووکان بۆ شوێنی ڕووداوەکە، بریندارەکان ڕەوانەی نەخۆشخانەی فریاکەوتن کران و تەرمەکەش ڕەوانەی پزیشکی دادوەری کرا، ئێستاش پەڕاوی لێکۆڵینەوە بۆ ڕووداوەکە کراوەتەوە و لێکۆڵینەوەکان بەردەوامن".