بنەماڵەی میری ئێزدییان کەسێکیان وەک گوتەبێژی فەرمیی بنەماڵەکەیان دەستنیشان کرد.

عامر مەحمود سیدۆ میرزا بەگ، خۆی بە گوتەبێژی بنەماڵەی میری ئێزدییان ناساند و ڕایگەیاند: ”دەنگدان لەنێو ماڵی میری ئێزدییان کراوە لەسەر دانانی گوتەبێژێکی فەرمی، من توانیم باوەڕی هەموویان بەدەست بهێنم و ببمە گوتەبێژی بنەماڵەی میری ئێزدییان“.

ڕوونیشی کردەوە کە پاش کۆچی دوایی میر تەحسین بەگ لە ئەڵمانیا، بنەماڵەی میری ئێزدییان لە هەوڵدان بۆ دیاریکردنی میرێک کە جڤاتی ڕۆحانی و ئێزدیش لەسەری ڕازی بن.

جەختیشی لەوە کردەوە کە ئەو کەسەی دەبێتە میری ئێزدییان، نوێنەرایەتیی هەموو ئێزدییانی کوردستان و جیهان دەکات.

میر تەحسین بەگ، میری ئێزدییانی جیهان، لە ڕۆژی ٢٨ی ١ی ٢٠١٩ و لە تەمەنی ٨٦ ساڵیدا، لە نەخۆشخانەیەکی شاری هانۆڤەر لە ئەڵمانیا کۆچی دوایی کرد و دواتر لە مەراسیمێکی تایبەتدا تەرمەکەی گەڕێندرایەوە هەرێمی کوردستان.












باسنیوز