بڕیارە لە سەرەتای مانگی دابێ ئەنجومەنی نوێنەرانی عێراق پرسی پۆستی وەزارەتەکان و سەرۆکی لیژنەکانی پەرلەمان یەکلا بکاتەوە. پەرلەمانتارێکی کوردیش دەڵێ، تا ئاستەنگی نێوان لایەنەکان چارەسەر بکرێت، بڕیارە وەزارەتێکی نوێ بە ناوی ئاسایشی نیشتمانی دابمەزرێت.

دکتۆر محەمەد شاکر، پەرلەمانتاری فراکسیۆنی پارتی لە پەرلەمانی عێراق ئاشکرای کرد: "بڕیارە لە سەرەتای مانگی ئادار پەرلەمانی عێراق دەست بە کۆبوونەوەکانی بکاتەوە کە ئێستا لە پشووی زستانەدایە و بڕیاریشە لە سەرەتای دەستکردن بە کۆبوونەوەی کێشەی پۆستی ئەو وەزارەتانەی ماون و دانانی سەرۆک و ئەندامانی لیژنەکانی پەرلەمان یەکلا بکرێنەوە.

ئەو پەرلەمانتارە بە ماڵپەڕی فەرمیی پارتی دیموکراتی کوردستانی ڕاگەیاند: "بڕیارە لە دوای ٣ی ئادار پەرلەمان ھەموو ھەوڵەکانی بخاتە گەڕ بۆ ئەوەی پۆستی وەزارەتەکان یەکلا بکرێنەوە، کە دانوستان ھەیە لە نێوان پارتی و یەکێتی بۆ چارەسەرکردنی پرسی وەزارەتی داد و لە نێوان لایەنە عەرەبییەکانیش وەزارەتێکی نوێ بە ناوی ئاسایشی نیشتمانی دادەمەزرێت ئەوەش دەبێتە ھۆی ئەوەی کە پۆستی وەزارەتی ناوخۆ و بەرگری یەکلا بکرێنەوە."

لەبارەی لیژنەکانی پەرلەمانەوە شاکر دەڵێت: "پەرلەمانی عێراق ٢١ لیژنەی ھەمیشەیی ھەیە و ئێستا لە لایەن بەتەمەنترین ئەندامەوە سەرۆکایەتیی ھەر لیژنەیەک دەکرێت، ئەوەش یەکلا دەکرێتەوە، چونکە پێچەوانەی دەستوورە و ھەموو لیژنەکانی پەرلەمانی عێراق لە مانگی دابێت سەرۆک و جێگر و بڕیاردەریان بۆ دیاری دەکرێت، ھەرچەندە ئێستا لیژنەکان چالاکن و کاری خۆیان دەکەن."

kdp-