فەرماندەیەكی ئەمەریكا ئاشكرای دەكات، ئەگەر هێزەکانی سووریای دیموکرات (ھەسەدە) لەگەڵ حكوومەتی سووریا رێكبكەوێت، واشنتن ھاوكارییەكانی دەوەستێنێت.

ژەنەراڵ پاول لاكامیرا، فەرماندە لە سوپای ئەمەریكا بە رۆیتەرزی راگەیاندووە: "ھاوپەیمانی نێودەوڵەتی بە سەرپەرشتی ئەمەریكا، لە ھاوكاریكردن و راھێنان بە ھێزەكانی سووریای دیموكرات بەردەوامە، بەڵام ئەگەر ھەسەدە لەگەڵ حكوومەتی سووریا و رووسیا رێكبكەوێت، ئەمەریكا ئەو ھاوكارییە سەربازییانە دەوەستێنێت".

پێشتر ھەسەدە رایگەیاندبوو، ئەگەر ئەمەریكا پشت لە كورد بكات و لە سووریا بكشێتەوە، بۆ رێگریكردن لە ھێرشەكانی توركیا ناچارن لەگەڵ حكوومەتی سووریا رێكبكەون و تا ئێستاش دانووستانەكانی ئەنجوومەنی سووریای دیموكرات لەگەڵ دیمەشق بەردەوامن.

ئەمەش لە کاتێکدایە، جەیمس جێفری، نێردەی ئەمەریکا بۆ کاروباری سووریا و جەنگی دژ بە داعش رایگەیاندبوو، رێگا نادەن رژێمی سووریا جێگای ئەمەریکا لە سووریا بگرێتەوە.




K24