فەرماندەی یەکەی ٧٠ی ھێزی پێشمەرگەی کوردستان کە ئەندامی مەکتەبی سیاسیی یەکێتیی نیشتمانیی کوردستانە، وەڵامی ئەو زانیارییانەی دایەوە کە باس لە کاندیدبوونی بۆ پۆستی وەزیری پێشمەرگە دەکەن.

پاش ئەوەی دەنگۆی کاندیدبوونی شێخ جەعفەر مستەفا بۆ پۆستی وەزیری پێشمەرگە بڵاو بووەوە، شێخ جەعفەر، فەرماندەی یەکەی ٧٠ی پێشمەرگە و ئەندامی مەکتەبی سیاسیی یەکێتی ڕايگەیاند: ”ھێشتا پەرلەمان کۆنەبووەتەوە و ڕێککەوتنێکمان نییە، بۆیە ھیچ کەسێک کاندید نییە، ھەر کەس ئەو دیعایە دەکات، ڕاست ناکات“.

ئەوەشی ئاشکرا کرد: ”تەنیا تموحم ئەوەیە، فەرماندەی یەکەیەکی ھێزی پێشمەرگەی کوردستان بم لە سەنگەرەکانی پێشەوە، تا دژی ھەر ھەڕەشەیەک بم کە ڕووبەڕووی ئەم ھەرێمە دەبێتەوە، ھەروەھا سوپایەکی یەکگرتوو بۆ ئەم ھەرێمە دروست بکەین و یەکێتی و یەکڕیزیی میللەتەکەمانم لە ھەموو شتێک بەلاوە گرنگترە“.

شێخ جەعفەر باسیشی لە کابینەی داهاتووی حکوومەتی هەرێمی کوردستان کرد و ڕای گەیاند: ”بڕوام وایە ئەم کابینەیە ھەر کاتێک دروست ببێت، بۆ بابەتی یەکڕیزی و یەکگرتوویی و ئەو تەوافقەی کە ھەیە، یەکێک دەبێت لە کابینە ھەرە سەرکەوتووەکان بۆ ئەم قۆناغەی تێیدا دروست دەبێت، چونکە لە کاتێکی جیاوازە و لە قۆناغێک دیکەدایە“. جەختیشی کردەوە: ”کاک مەسرور دەتوانێت سەرکەوتوو بێت، چونکە ئەزموونێکی باشی ھەیە و مومارەسەی ھەیە و پێشتریش لێپرسراوێتی ھەبووە“.











باسنيوز