فەرماندێ‌ فەرماندەیا شنگال یا پێشمەرگەهێ كوردستانێ‌ دیار كر: "نۆكە ل قەزا شنگال دەست ب كارێ بازرگانیا نەقانوونی هاتیە كرن دناڤبەرا وەلاتێ سوریا و شنگالێ‌ دا وداهاتێ هەموو تشتەكێ‌ ژی بۆ هندەك لایەنێن نە قانوونی دهێتە رەوانە كرن.

قاسم شەشۆ، فەرماندێ‌ فەرماندەیا شنگال یا پێشمەرگەهێ كوردستانێ‌ دیار كر: "نۆكە بازرگانیا جگارە و ئاژەلی و هەموو تشتەكێ‌ دی ب ریێن نە قانوونی ناڤبەرا سوریا و شنگالێ‌ دا دهێتە كرن. پشتی دەرگەهێ‌ سنۆری ژلایێ‌ حكومەتا عێراقی ڤە هاتیە دائێخستن نۆكە لایەنێن نە قانوونی ل شنگال ب ریێن نە قانوونی بازرگانیێ دكەن وداهاتێ ژی هەموو بۆ وان دمینت".

مەحما خەلیل، قایمقامی قەزا شنگال دیار كر: "هندەك كەس بۆ بەرژوەندیا خوە ل دەڤەرا شنگال كاردكەن. نابیت مرۆڤ لسەر بەژوەندیا خەلكێ‌ شنگال بۆ هندەك كەسان كاربكەت. ئەڤە نۆكە ل شنگال دهێـتە كرن بۆ بەژوەندیا خەلكێ‌ نینە. ئەم چاڤەرێنە پێشمەرگەه ڤەگەرنە شنگال وئیدارا شەرعی یا شنگال بزڤرتە شنگال داكو كۆنترۆل لسەر هەموو كارێن نە قانوونی بهێـتە كرن".

خویا ژی كر: "دەمێ‌ پێشمەرگەه دزڤرتە شنگال دێ‌ ئاڤەدانی وئاشتی ل دەڤەرێ دروست بیت، دێ‌ خەلك ژی زڤرنە سەر جه و مالێن خوە. ئەڤ كارێن نۆكە ل شنگال دهێنە كرن نامینن".



باسنیوز