بەرپرسێکی پارتی دیموکراتی کوردستان لە کەرکووک دەڵێ، پارتی دیموکراتی کوردستان تا ئێستا پێداگرە لەسەر نەگەڕانەوە بۆ کەرکووک، تاوەکو دۆخەکەی ئاسایی دەکرێتەوە، بۆیە کۆبوونەوەی ١٨ی مانگ لە ھەولێر ئەنجام دەدرێت نەک لە کەرکووک و ھیوادارین ھەموو لایەک بەشداریی تێدا بکەن.

دیاری حوسێن، جێگری بەرپرسی ئەنجومەنی سەرکردایەتیی پارتی دیموکراتی کوردستان لە کەرکووک-گەرمیان، بە ماڵپەڕی فەرمیی پارتی دیموکراتی کوردستانی ڕاگەیاند: "بڕیارە ١٨ی ئەم مانگە ئەنجومەنی پارێزگای کەرکووک کۆبوونەوەیەک ئەنجام بدات و تێیدا چەندین پرس گفتوگۆیان لەسەر بکرێت و کۆبوونەوەکەش لە ھەولێر ئەنجام دەدرێت، نەک کەرکووک، چونکە پارتی دیموکراتی کوردستان تا دۆخەکە ئاسایی نەبێتەوە ناگەڕێتەوە بۆ کەرکووک، بۆیە ئێمە پێداگرین لەسەر ھەڵوێستی خۆمان."

دیاری حوسێن گوتیشی: "کۆبوونەوەکەی ئەنجومەنی پارێزگای کەرکووک بۆ کاراکردنەوەی ئەنجومەن و چۆنیەتیی کارکردنی ئەنجومەنە و دانانی بەرنامەیەک بۆ ئایندە، بۆیە ھیوادارین ھەموو لایەنەکان بەشداریی تێدا بکەن، بۆیە کۆبوونەوەکە گشتییە و تەنیا بۆ لیستی برایەتی نییە."

حوسێن باسی لەوەش کرد: "گفتوگۆ ھەیە بۆ ئەوەی پێشمەرگە بگەڕێتەوە کەرکووک و ھەرکاتێک بەرھەمی ھەبوو ئەوکات ئێمەش دەگەڕێینەوە، بەڵام بەو شێوەی ئێستا ناگەڕێینەوە."

حوسێن گوتیشی: "لە کۆبوونەوەی ١٨ی مانگ پارێزگار دیاری ناکرێت و ئێمە لەگەڵ ئەوەداین کە پارێزگار کەسێکی بێلایەن بێت تا ھەڵبژاردن دەکرێت، بۆ ئەوەی بتوانێ کێشەکان چارە بکات."
kdp-