بەڕێوەبەری گشتیی وەزارەتی بازرگانیی  حكوومەتی ھەرێمی كوردستان گوتی، بڕیار وایە لە ١٧ی ئەم مانگەدا بە شێوەیەكی فەرمی خاڵە گومرگییەكانی نێوان ھەرێم و عێراق لابدرێن و لە سەرتاسەری عێراق و ھەرێمی كوردستانیش یەك پێناسەی گومرگی دەبێت.

نەوزاد ئەدھەم، بە ماڵپەڕی فەرمیی پارتی دیموكراتی كوردستانی ڕاگەیاند: "دوای رێككەوتنی ھەردوو حكوومەتی ھەرێم و عێراق لەسەر پێناسەكردنی گومرگی یەكگرتوو، بڕیارە لە ١٧ی ئەم مانگەوە دەست بە جێبەجێكردنی بكرێت لە ھەموو عێراق و ھەرێمی كوردستان و لە سەرجەم ناوچەكانیش یەك پێناسەی گومرگی دەبێت".

ئەدھەم گوتیشی، حكوومەتی عێراقیش لابدرنی خاڵە گومرگییە نایاساییەكانی نێوان ھەرێم و عێراق لە كاتی جێبەجێكردنی پێناسەی گومرگی یەكگرتوودا جێبەجێ دەكات، بۆیە جێبەجێكردنی ئەم ھەنگاوە زۆر گرینگە بۆ كاری بازرگانی.

دەشڵێ، لەگەڵ دەستەی گومرگی دانیشتوون و باسیان لەوە كرد كە بڕیارە لە ١٧ی ئەم مانگەدا پێناسەی گومرگی یەكگرتوو لە سەرتاسەری عێراق و ھەرێمی كوردستان جێبەجێ بكرێت، ھەر ئەو كاتیش خاڵە گومرگییەكان لادەبرێن، چونكە حكوومەت و پەرلەمانیش بڕیاریان لەسەر داوە.
kdp-