بەرپرسی لقی 26ی گوڵان لە قەزای چۆمان دیاری كرد، بۆ نەمانی كێشەكان، هەولێر و بەغدا زیاتر لێك نزیك دەبنەوە، بەرەوپێشچوونی پەیوەندییەكانیش بۆ سیاسەتی حەكیمانەی سەرۆك بارزانی دەگەڕێتەوە.

پێش كەمێك نێچیرڤان بارزانی، سەرۆكوەزیرانی هەرێمی كوردستان لە بەغدا لەگەڵ عادل عەبدولمەهدی، سەرۆكوەزیرانی عێراق كۆ بووەوە.

حەسەن حەدۆ، بۆ ماڵپەڕی فەرمیی پارتی دیموكراتی كوردستان گوتی: "ئۆمێدی خەڵكی كوردستان ئەوەیە كە لە چوار ساڵی داهاتوودا كوردستانێكی بەهێزیان هەبێت و لە ڕووی ئابووری و سیاسییەوە كوردستان زیاتر پێش بكەوێت و ئەو كێشە و قەیرانانەی كە هەن نەمێنن، ئۆمێدی خەڵكی كوردستان هەر ئەوەیە و هەر ئەوەش لە كابینەی داهاتووی حكوومەتی هەرێم چاوەڕێ دەكرێت."

بەرپرسی لقی 26ی گوڵان گوتیشی: "بەرەوپێشچوونی پەیوەندییەكانی هەولێر و بەغدا بۆ سیاسەتی حەكیمانەی سەرۆك بارزانی دەگەڕێتەوە، سەردانی بەڕێزیان بۆ بەغدا ئەو بەستەڵەکەی تواندەوە كە لە نێوان هەولێر و بەغدا هەبوو، ئێستا تێگەیشتنێك دروست بووە، خەڵكی كوردستانیش بەو سەردانە و ئەو شتانەی كە دەكرێن دڵخۆشن و هیوادارن هەموو ئەو كێشانەی كە لە نێوان هەولێر و بەغدا هەن نەمێنن و ڕۆژبەڕۆژ كوردستان پێش بكەوێت، لە داهاتوویەكی نزیكدا ئەنجامی ئەو سەردانەی سەرۆك بارزانی زیاتر بۆ خەڵكی كوردستان بەدەر دەكەوێت و زیاتر لێك نزیك دەبنەوە بۆ نەمانی كێشەكان".
kdp-